Ձեր վստահելի աղբյուրը

«Կամ մենք պետք է քննենք 44 օրյա պատերազմի հիմնական պատճառները, կամ էլ ես՝ որպես պատգամավոր, դուրս պետք է գամ այստեղից բանակի հետ կապված հարցերի պատճառով»,-խորհրդարանում հայտարարեց «Հայաստան» խմբակցության ղեկավար Սեյրան Օհանյանը և պնդեց, որ պետք է պատերազմի իրական գնահատականները տրվի և պետք չէ հիվանդագին ընդունել դրանք, քանի որ բոլորն էլ այդ թերություններն ունեն և դրա տերն են:

Պատգամավորը հայտնեց, որ յուրաքանչյուր երկրի տնտեսությունը ռազմական ներուժի առաջին բաղկացուցիչ մասն է, և որքան զարգացած է տնտեսությունն, այնքան զարգացած է անվտանգության միջավայրը:

Սեյրան Օհանյանը հայտարարեց, որ երբ իշխանությունը խոսում է բանակի բյուջեի աննախադեպ փոփոխության մասին, ապա ինքը պետք է ասի, որ այդ փոփոխությունները հիմնականում ռազմական կարողություններին չեն ուղղվել և այնքան էլ շատ չեն եղել: 

Նրա խոսքով, այդ փոփոխությունների մեծ մասը սննդի առումով են իրականացվել, որի ծրագրերը մշակվել է դեռ իր պաշտոնավարման ժամանակ, բայց հնարավորություն չի եղել իրականացնել:

Սեյրան Օհանյանը նկատեց, որ այսօրվա ռազմական բյուջեի մեջ մտցվել են միջպետական վարկերը, այն դեպքում, երբ իր պաշտոնավարման ժամանակ բանակին տրված 200 +20 մլն ԱՄՆ դոլար վարկը բյուջեում չի երևացել:

«Բանակը բոլոր նախարարների ժամանակ զարգացել է և ունեցել է թերություններ, ես չեմ խորշում խոսել այդ թերություններից և բանակում ծառայելու ժամանակ միշտ ներկայացրել եմ և անհաշտ պայքար ենք ծավալել այդ ուղղությամբ»,- հայտարարեց «Հայաստան» խմբակցության ղեկավարը:

Նրա խոսքով, Ռոբերտ Քոչարյանի ժամանակ 2003-2006 թթ. առաջին ամենախոշոր ռազմատեխնիկական համագործակցության և մատակարարման պայանագիրն է կնքվել՝ երեք հատ S 300 է բերվել, երկու հատ անվճար Իլ 76, մեկն էլ գնվել է Սերժ Սարգսյանի ժամանակ:

«Իմ օրոք 1300 ինքնաթիռաչվերթ սպառազինություն ենք բերել, որոնց թվում կրկին երեք հատ S 300 հակաօդային հրթիռային կայան»,- հայտարարեց պաշտպանության նախկին նախարարը և հարցրեց, թե ինչո՞ւ սպառազինության ծրագիրը փոխվեց և 2018 թվականից հետո նախատեսված ԱԹՍ-ները ձեռք չբերվեցին:

Ընդդիմադիր խմբակցության ղեկավարը հայտնեց, որ հարց է տվել Պաշտպանության և անվտանգության հարցերի մշտական հանձնաժողովի նախագահի թեկնածու Անդրանիկ Քոչարյանին, թե իր ղեկավարած հանձնաժողովն ինչ է արել սահմանի իրավիճակը ուսումնասիրելու համար, իսկ վերջինս իր ելույթում պատասխանելու փոխարեն իրեն հիշեցնում է, որ ինքը ծառայել է խորհրդային 366 մոտոհրաձգային գնդում, վաշտի հրամանատար էր, որը  մասնակցել է «Կոլցո» օպերացիային:

Սեյրան Օհանյանը հայտարարեց, որ Անդրանիկ Քոչարյանի ասածն իրականության չի համապատասխանում և անթուլատրելի մոտեցում է այդ գնդի ներայացուցիչների հանդեպ, որոնք տարիներ ի վեր գտնվել են Արցախում, կիսել արցախցիների դժվարությունները և հեռանալով՝ Արցախին թողել են ամեն ինչ:  

«Ես վաշտի հրամանատար չեմ եղել, այլ գումարտակի և միայն իմ ստորաբաժանումից, գաղտնիք չէ, 33-ից ավելի հետևակի մարտական մեքենա են թողել և խոսել այդ անձնակազմի մասին, որ նրանք մասնակցել են «Կոլցո» օպերացիային՝ գտնում եմ, որ ճիշտ չէ»,- ասաց Օհանյանը:

Նա հայտնեց, որ իրականությանը չի համապատասխանում նաև Անդրանիկ Քոչարյանի այն պնդումը, թե Մարտի 1-ին Երևանում նոր կայազոր է ձևավորվել և բացատրեց, որ ՀՀ քաղաքների կայազորները միշտ եղել են ՊՆ կառուցվածքի մեջ:

Անդրադառնալով իր որդու վերաբերյալ հնչած ելույթներին՝ Սեյրան Օհանյանն ասաց. «Իմ որդին ընտրել է զինվորականի մասնագիտությունը և պատերազմի ժամանակ վիրավորվել է, ես հպարտանում եմ և գլխով պատասխան եմ տալիս, որ ինքը վիրավորվել է մարտական գործողությունների ժամանակ, իսկ այն շահարկումները, որ նա ինքնախեղում է իրականացրել, իրականությանը չեն համապատասխանում և բարոյականից զուրկ արտահայտություններ են»: