Ձեր վստահելի աղբյուրը

ՀՀ Ոստիկանությունից տեղեկացնում են,որ օգոստոսի 4-ին, ժամը 20.55-ին, շտապօգնության կայանից ոստիկանության Արտաշատի բաժին հաղորդում էր ստացվել, որ Երևան-Երասխ ճանապարհին՝ Աղաջանի վանք մատուռի մոտ, վիճաբանություն է, իրենք էլ կանչով մեկնում են:

20 րոպե անց հաղորդում էր ստացվել արդեն «Արտաշատ» բժշկական կենտրոնից. «կրծքավանդակի կտրած-ծակած, թափանցող վերք» ախտորոշմամբ բուժօգնության էր ընդունվել Արտաշատի բնակիչ, 25-ամյա մի երիտասարդ:

Նախ դեպքի վայր, ապա նաև հիվանդանոց են մեկնել ոստիկանության օպերատիվ խմբեր:
Ըստ բժշկի տեղեկանքի` երիտասարդն ի վիճակի չի եղել հաղորդում կամ բացատրություն տալու: Վնասվածքը ծանր է եղել:

Օպերատիվ խմբերը ձեռնարկել են անհրաժեշտ միջոցառումներ, իսկ բաժնի քրեական հետախույզներն օպերատիվ-հետախուզական միջոցառումների շնորհիվ ստացել են տվյալներ, որի արագ իրացրին: Ժամը 22.30-ին մատուռի մոտակայքից, մարմնական վնասվածք հասցնելու կասկածանքով, բերման են ենթարկվել Արտաշատի 33-ամյա մի բնակչի՝ նախկինում դատված: Նա ներկայացվել է Արարատի մարզային քննչական վարչություն ու ձերբակալվել:

Ձեռնարկված միջոցառումների արդյունքում դեպքի վայրի տարածքում հայտնաբերվել է հանցագործության գործիք կռփազենք-դանակը:
Դեպքի հանգամանքները նախաքննությամբ պարզվում են: