Ձեր վստահելի աղբյուրը

«Ուզում եմ մեկընդմիշտ գիտակցեք, որ Աժ նախագահումը ձեր ֆեյսբուքյան տիրույթը չէ, որ եթե ինչ-որ մեկի մեկնաբանությունը ձեր դուրը չգա՝ վերցնեք և բլոկեք, ինչն արել եք բազմաթիվ քաղաքացիներին  և այդ թվում՝ նաև ինձ»,-ԱԺ նախագահ Ալեն Սիմոնյանին դիմեց «Հայաստան» խմբակցության պատգամավոր Հռիփսիմե Ստամբուլյանը ԱԺ հերթական հանձնաժողովի նախագահի ընտրության հարցը քննարկելիս:

Նկատելով որ Սիմոնյանը ժպտում է՝ Ստամբուլյանը հարցրեց, թե ինչո՞ւ է ժպտում, այն դեպքում, երբ պատգամավորը իրավունք չունի իր քաղաքացիներին տարանջատելու, կիսելու, ինչը իշխող ուժը տարիներ շարունակ արել է և դրանով եկել իշխանության:

Անդրադառնալով Ալեն Սիմոնյանի ելույթի ժամանակ հնչած դաստիարակության և կրթության մասին ակնարկին՝ պատգամավորը հարցրեց, թե ո՞ւմ նկատի ունի և ո՞ւմ է դահլիճում տեսնում ոչ բավարար կրթությամբ կամ դաստիարակությամբ:

«Ես ձեզնից պահանջում եմ, ոչ թե խնդրում, որ իշխող կուսակցության պատգամավորներին կարգի հրավիրեք, որ փողոցային բառապաշար այլևս չհնչի դահլիճում, եթե ուզում եք մասնավո դեպքերով նշեմ, ապա օրեր առաջ Գեղամ Մանուկյանի ելույթի ժամանակ հնչած Քրիստինե Պողոսյանի ակնարկը, վերցրեք ձայնագրությունը և լսեք»,-հայտարարեց ընդդիմադիր պատգամավորը և հայտնեց, որ ապշած է, որ կինը նման ակնարկ կարող է թույլ տալ ԱԺ-ում:

Ալեն Սիմոնյանը հարցրեց թե Ստամբուլյանը ԱԺ ամբիոնի մոտ կանգնած Ֆինանսավարկային և բյուջետային հարցերի մշտական հանձնաժողովի նախագահի թեկնածու Գևորգ Պապոյանին հարց ունի՞ տալու:

Ստամբուլյանն ասաց, որ ունի և կրկին Սիմոնյանին հարցրեց, թե ի՞նչ իրավունքով է արձագանքում իրեն և խլում կանոնակարգով իրեն հարցի համար հասանելիք ժամանակը, չի՞ ցանկանում լսել իրականությունը

«Խնդրում եմ ԱԺ նիստերի դահլիճ մտնելուց առաջ, դաստիարակությունից խոսելուց առաջ վերացրեք բոլորի մաստակները, որպեսզի ԱԺ նիստի ժամանակ մաստակներով չնստեն իշխանավոր պատգամավորները»,-կոչ արեց Ստամբուլյանը::