Ձեր վստահելի աղբյուրը

«Մշտական հանձնաժողովներ կլինեն, թե չեն լինի, ո՞վ կնախագահի դրանք, միևնույն է, այս ամենաթողությունը շարունակվելու է, քանի որ այս իրավիճակի հեղինակը Հայաստանն ու Արցախը ավիրած, կապիտուլյանտ Նիկոլն է»,- խորհրդարանում իր ելույթի վերջում ասաց «Պատիվ ունեմ» դաշինքի պատգամավոր Աննա Մկրտչյանը։

ԱԺ նախագահ Ալեն Սիմոնյանը հորդորեց պատգամավորին դուրս գալ դահլիճից, հակառակ դեպքում անվտանգության աշխատակիցները նրան դուրս կտանեն:

«Օրերս ես տիկին Մկրտչյանին նախազգուշացում տվել էի, այժմ Ձեզ հեռացնում եմ տվյալ օրվա մինչև օրվա ավարտը կայանալիք նիստերից՝ զրկելով այդ ընթացքում դահլիճում ներկա լինելու իրավունքից: Դուրս եկեք դահլիճից, հակառակ դեպքում, անվտանգության աշխատակիցները Ձեր դուրս կբերեն»,-ասաց Ալեն Սիմոնյանը, որից հետո Աննա Մկրտչյանն ինքնակամ հեռացավ։

Այսպիսով. Փաշինյանին անունով դիմելու և կապիտուլյանտ բառը օգտագործելու համար Աննա Մկրտչյանը մինչև օրվա ավարտը զրկվեց դահլիճում գտնվելու իրավունքից:

Նշենք, երբ «Պատիվ ունեմ»-ի պատգամավորը դուրս եկավ դահլիճից, նրան հետևեցին նաև «Հայաստան» դաշինքի մի խումբ այլ պատգամավորներ:

Աննա Մկրտչյանն իր ելույթի սկզբում հայտնեց, որ ԱԺ-ում ոչ թե ընտրվում են ԱԺ հանձնաժողովների նախագահներ, այլ նշանակվում են, ինչը երևում է ԱԺ մեծամասնության թեկնածուների վարքից, ըստ որի՝ անկախ ամեն ինչից, իրենք նշանակվելու են:

Նա նկատեց, որ իշխանական թեկնածուները չեն պատասխանում ընդդիմության բովանդակային հարցերին:

«Հայաստան» խմբակցության պատգամավոր Արամ Վարդևանյանի կարծիքով, այն ինչ տեղի ունեցավ Աննա Մկրտչյանի նկատմամբ, ԱԺ կանոնակարգ սահմանադրական օրենքի կոպիտ խախտում է: