Ձեր վստահելի աղբյուրը

«Պարոն Սիմոնյան, կուզեի մի բան ճշտել, որ հետո անհարկի միջամտություն չլինի, օրինակ՝ մի պաշտոնի համար քավորին դավաճանողին համարենք կապիտուլյա՞նտ, թե՞ դավաճան, հոմանիշը ո՞րն է»,-ԱԺ նախագահին իր ելույթի սկզբում հարցրեց «Հայաստան» խմբակցության պատգամավոր Գեղամ Մանուկյանը:

Ելույթից պարզվեց, որ Գեղամ Մանուկյանը ակնարկում էր Հայկ Կոնջոյանին, որն իր ելույթում խոսել էր «Հայաստան» խմբակցության ղեկավար Սեյրան Օհանյանի՝ շեֆ ունենալու մասին:

«Պարոն Կոնջորյան, շեֆ ասելով դուք ի՞նչ նկատի ունեք՝ ժամանակին ՀԺԱՄ կուսակցության ղեկավարի՞ն, թե սրբություն համարվող, ձեր կնքահայր «Լուսավոր Հայաստան» կուսակցության առաջնորդ Էդմոն Մարուքյանին: Գիտե՞ք, շեֆը մի անգամ է լինում»,-հայտնեց ընդդիմադիր պատգամավորը: 

Անդրադառնալով Ֆինանսավարկային և բյուջետային հարցերի մշտական հանձնաժողովի նախագահի ընտրությանը՝ Գեղամ Մանուկյանը հայտնեց, որ այլ իրավիճակում հարցի վերաբերյալ այլ քննարկում կծավալվեր, իսկ հիմա ցանկանում է ասել, որ պետական բյուջեն դարձել է ոչ թե տան փող, այլ գրպանի փող:

Նրա խոսքով՝ իշխանությունները ինչպես ուզում են, այնպես էլ բյուջեի հոդվածները փոխում են և մարդիկ ուշադրություն չեն դարձնում  դրանց, բայց պնդեց, որ չկա կառավարության որևէ նիստ, որի ժամանակ բյուջեի այս կամ այն տողով հոդված չփոփոխվի:

Գեղամ Մանուկյանը նկատեց, որ պետական բյուջեն դառնում է պարգևավճար, բայց այսուհետ խորհրդարանական ընդդիմությունը նախատեսում է վերահսկել բյուջեի միջոցները:

«Երևանի քաղմասերը կարող եմ ցուցակագրել՝ երևի քաղմաս չկա, որ Իշխան Սաղաթելյանը մի քանի ժամով եղած չլինի»,-անդրադառնալով Սաղաթելյանին ակցիայից արագ հեռացնելու դեպքի մասին ՔՊ-ական պատգամավորների ելույթներին, ասաց «Հայաստան» խմբակցության պատգամավորը և հավելեց. «Երբ որ կուսակցական ընկերները որոշում են, որ իրենց կուսակցական ղեկավարն այդ պահին չպետք է բերման ենթարկվի, իսկ Դաշնակցության համար այն որոշում է եղել, դաշնակցական տղերքը որոշում են ու անում են, այդ թվում նաև իմ որդին է արել»:

Մանուկյանը նկատեց, որ այդ միջադեպի ժամանակ կառավարության երկու շենքերի միջև ընկած 50 մետրը Փաշինյանի անցնելու համար 4000 ոստիկան էին հանել փողոց և ՀՅԴ շատ տղաներ բերման են ենթարկվել, բայց կոնկրետ այդ օրը սկզբունքայնորեն որոշել էին որ,  Իշխան Սաղաթելյանը չպետք է բռնվի, ոչ թե վախենում էին բռնվելուց, այլ որոշել էին և պետք է անեին:

Մանուկյանը հայտարարեց, որ փախնելու մասին ՔՊ-ական պատգամավորները կարող են հարցնեն իրենց շեֆին, թե «մարտի 1»-ին տանիքներով ինչպես էր փախնում:

«Փախնելուց խոսելուց հիշեք, որ նոյեմբերի 9-ի կապիտուլացիայի հայտարարությունից հետո բունկեր էիք ման գալիս, որ փախնեիք. Դրանից հետո լրագրողները 2 ամիս մոմի լույսով  իշխանական պատգամավոր չէին կարողանում գտնել»,-ասաց «Հայաստան» խմբակցության պատգամավորը և հավելեց, որ պաշտոնի համար քաղաքական մի ճամբարից մյուսը փախնելն շատ ավելի վատ է, քան ոստիկաններից փախնելը: