Ձեր վստահելի աղբյուրը

«Հիմա մենք բանակցությունների շրջափուլում ենք և սկզբունքային նշանակություն ունի, թե ինչն  է ելակետը և ինչ պատմական իրողությունների վրա ենք կառուցելու մեր հետագա հարաբերությունները, որպեսզի լինենք ավելի պինդ ու ամուր, այլ ոչ թե, որ հիմա հաճախ տեսնում եմ, ամեն գնով փորձում են Սովետական Հայաստանի անընդհատ կրճատված տարածքը ներկայացնել, որպես Հայաստանի իրական տարածք»,- Եվրոպական ինտեգրման հարցերի մշտական հանձնաժողովի նախագահի թեկնածու Արման Եղոյանին դիմեց «Հայաստան» խմբակցության քարտուղար Արծվիկ Մինասյանը՝ ցույց տալով այն գիտական աշխատանքների ժողովածուն, որում ասվում է՝ Հայաստանի Առաջին հանրապետությունը բոլշևիկյան իշխանություններին փոխանցել է 42 հազար քառ. կմ տարածքով Հայաստան, և որի հերքմամբ նախորդ ելույթներում հանդես էր եկել Եղոյանը:

Վերջինս պատասխանեց, որ Առաջին հանրապետության պատմությունը շատ դաշնակցականներից ավելի լավ գիտի և գրքում ներկայացրած փաստերը ուսանողության տարիներին է ուսումնասիրել:

ՔՊ խմբակցության պատգամավորը պնդեց՝ 40-42 հազար քառ. կիլոմետրն այն տարածքն է, որը դաշնակցական կառավարությունը համաձայնեցրել էր ռուսական կառավարության հետ, որը պիտի մնար Հայաստանին, բայց փաստացի այդքան հող չկար, քանի որ այդ քարտեզներում կային տարածքներ, որոնք հայերի վերահսկողության տակ չէին:

«Հիմա ասեմ դաշնակցականների ապիկար կառավարման հետևանքով վարչապետ Համո Օհանջանյանը հողատո՞ւ էր, Կարս է հանձնել, Արդահա՞ն և այլն, բայց այդպես չեմ կարծում»,-հայտարարեց Եղոյանը և հիմնավորեց, որ իր կարծիքով Օհանջանյանը որպես հայրենասեր մարդ թուրքական ագրեսիայի դեմ պայքարել է այնքան, ինչքան կարողացել է և պահել է այնքան տարածք, ինչքան առաջին հանրապետության կառավարությանը հաջողվել է մինչև վերջին փամփուշտը կռվելով պահել:

«Պարզվում է, ոչ միայն նրբանկատ չեք, այլ բավական սանձարձակ հայտարարություններ եք անում, պարոն Եղոյան, հայտնելով, որ գնահատականներ չեք տալիս՝ տալիս եք դրանք և պիտակավորում»,-արձագանքեց Արծվիկ Մինասյանը:

«Հայաստան» խմբակցության պատգամավորը շեշտեց, որ երբ ասում է հայ-ռուսական համաձայնագրի վրա այդ տարածքները փոխանցվել են թղթի վրա և բոլշևիկները պետք է ապահովեին այն, ապա նկատի ունի, որ այն կարևոր հիմք է հանդիսանալու Ադրբեջանի և Թուրքիայի հետ հետագա բանակցությունների համար:

Նիստ նախագահող ԱԺ փոխխոսնակ Հակոբ Արշակյանը, դիմելով Արծվիկ Մինասյանին, ասաց, որ հավանաբար «սանձարձակ» ասելու փոխարեն  նկատի է ունեցել «համարձակ», այլապես ինքը պետք է խնդրի կոռեկտ լինել գործընկերների հետ խոսելիս:

Եղոյանը հայտնեց՝ անկեղծորեն համարում է, որ Ալեքսանդրապոլի համաձայնագիրը ստորագրած Համո Օհանջանյանը և մյուսները հողատու չեն և, եթե Ագնեսա Խամոյանի և Իշխան Սաղաթելյանի տրամաբանությամբ շարժվի, ապա կարող է որպես քաղաքական գործիչ ասել նման բան, բայց որպես պատմաբան այդպես չի համարում: