Ձեր վստահելի աղբյուրը

«Քաղաքացիական պայմանագիր» խմբակցությունն ԱԺ աշխատանքի և սոցիալական հարցերի մշտական հանձնաժողովի նախագահի պաշտոնում թեկնածու առաջադրեց  Հերիքնազ Տիգրանյանին։ Նրան ներկայացրեց ՔՊ-ական Արսեն Թորոսյանը, ասաց՝ մասնագիտությամբ իրավաբան է, ներկայացրեց կենսագրությունը, նշեց՝  պատիվ է ունեցել աշխատել Տիգրանյանի հետ։

«Տիկին Տիգրանյանը, վստահ եմ, որ լավագույնս կիրականացնի հանձնաժողովի նախագահի գործառույթները՝ ապահովելով մասնակցային մթնոլորտ»,-խոսքն ամփոփեց Թորոսյանն ու կոչ արեց կողմ քեարկել թեկնածուին։

Ամբիոնին մոտեցած թեկնածուն ներկայացրեց իր անելիքներն ու դրանց վերաբերյալ պատկերացումները, օրինակ, ասաց սոցիալական աջակցությունը տրամադրվելու է կարիքների գնահատման վրա, օրենսդրական փոփոխություններ են իրականացրել, բարեփոխումներ են նախատեսում կենսաթոշակային ու նպաստի համակարգերում, մատչելի են դարձրել դրանց ստացումը, քանի որ անկանխիկ է վճարումը։

«Հայաստան» խմբակցությունից ՔՊ-ական թեկնածուին հարց ուղղեց դաշնակցական Արթուր Խաչատրյանը, հետաքրքրվեց, թե վերջին տարիներին սոցիալական քաղաքականությունը որքանո՞վ է նպաստում հարստության արդար բաշխմանը, որանքո՞վ է ներառական Հայաստանի տնտեսական աճը, գույքահարակի ներմուծումը կամ այլ փոփոխություններ որքանո՞վ են ազդել հարստության արդար բաշխման վրա։

Տիգրանյանն ասաց, 2019-ին եղել է 30 տոկոս աղքատություն, այսօր այն կարելի է գնահատել 26.6 տոկոսի չափով։

Ինչ վերաբերում է հանրային բարիքի հավասարաչափ բաշխմանը թեկնածուն, դա պայմանավորեվ հարկատուների բարեխղճությամբ։

«Դրա արդարացի բաշխումը կատարվում է  համապատասխան ծրագրերի շրջանակում՝ ըստ թիրախային խմբերի գնահատմնաը»,-ասաց ամբիոնի մոտ կանգնած թեկնածուն։
Խաչատրյանն արձագանքեց՝ դահլիճում նստած ոչ մի տնտեսագետ չի համաձայնի հարկատուների վերաբերյալ Տիգրանյանի ասածին, հիշեցրեց՝ լրիվ այլ հարցեր է ուղղել։

«Եթե չունեիք, այս պատասխանները, ասեիք՝ չունեի»,-նշեց Խաչատրյանը։

Հերիքնազ Տիգրանյանն էլ նշեց, որ ցանկացած փոփոխություն ունի սոցիալական կոմպոնենտ։

Մեկ այլ ընդդիմադիր պատգամավոր, տնտեսագետ Արծվիկ Մինասյանը հետաքրքրվեց՝ իրենք առաջարկել են կառավարական առանձնատները տրամադրել վիրավոր զինծառայողների վերականգնողական կենտրոնի կառուցման համար, ո՞րն է Տիգրանյանի կարծիքը։

«Հայաստանում կգտնի շատ անշարժ գույք այդ նպատակի համար, իսկ կառավարական առանձնատների մասին անընդհատ հիշատակումը, կներեք, ես համարում եմ ամբոխահաճություն: Ես ուզում եմ հիշեցնել, որ արցախյան երեք պատերազմ ենք ունեցել, դրանց հետևանքով ունեցել ենք վիրավորներ, զինհաշմանդամներ, որևէ անգամ չի ծագել այս հարցը։ Ինչո՞ւ հենց հիմա ծագեց, կարող ենք ասել, ուղղակի մի օր միտքը պայծառանում է»,-ասաց Տիգրանյանը։

«Հայաստան»-ից Արամ Վարդևանյանը Տիգրանյանին հորդորեց արցախյան նախորդ պատերազմների մասին խոսելիս, գոնե զոհերի թիվը համեմատել։ 

«Համեմատականը տեղին չէ,  բոլոր ասպեկտներով, առնվազն տեղյակ եք լինելու թվային տարբերություններին, էլ չասեմ մարդկային կյանքերի հետ կապված,-ասաց Վարդևանյանը։

Ի պատասխան, Տիգրանյանն ասաց, թվերին չի նայում, դեպքերին է  նայում։

Հարցի քննարկման մտքերի փոխանակության հատվածում «Հայաստան» դաշինքի պատգամավոր Գեղամ Նազարյանը մոտեցավ ամբիոնին, ասաց՝ նրան ստիպեց խոսել Տիգրանյանի «մտքի պայծառացման» մասին հայտարարությունը։ 

 «Մեր միտքը միտքը պայծառացավ, երբ մեր տուն դժբախտություն բերեցիք։ Մտածում եմ, մի՞թե նման կերպ մտածող մարդը կարող է սոցիալական հարցերով զբաղվել, կարծում եմ՝ չէ»,-ասաց Նազարյանն ու ՔՊ խմբակցությանն առաջարկեց այլ թեկնածու առաջադրել։

Նա հորդորեց՝ զգույշ լինել արտահատություններում, երբ խոսում են զինվորից, զինվորի ընտանիքից, ավելին ասաց, այդ նախաձեռնությամբ պետք է հանդես գար հենց իշխանությունը։

«Դուք 54 տոկոս ձայն եք ստացել, կարծում եմ՝ անվտանգության խնդիր չպետք է ունենայիք։ Այդ ամառանոցներում վիրավոր զինծառայողը պետք է ստանա բուժում, մասնագիտացում, որպեսզի այս կյանքում իր տեղը գտնի»,-ասաց նա։

ՔՊ-ական Սիսակ Գաբրիելյանն ասաց՝ եղել է ամառանոցներում, չի կարծում, որ հարմար է զինծառայողների համար՝ «փոշոտ, կեղտոտ Երևանում», առաջարկեց նորը կառուցել աղմուկից հեռու։