Ձեր վստահելի աղբյուրը

«Թալիբան» շարժման գրոհայինները գրավել են Աֆղանստանի հյուսիսային, արևմտյան և հարավային շրջանների մեծ մասը:Associated Press-ի տարածած լուրը ներկայացնում է «Գազետա ռու»-ն:

Լոգար մարզի պատգամավոր Հոդա Ահմադին լրատվական գործակալությանը հայտնել է, որ շարժմանը հաջողվել է գրավել ամբողջ նահանգը և ձերբակալել տեղի պաշտոնյաներին:

«Թալիբները հասել են Չար Ասյաբ շրջան, որը գտնվում է մայրաքաղաք Քաբուլից ընդամենը 11 կիլոմետր հարավ»,-ասվում է հաղորդագրության մեջ:

Թալիբները հարձակվել են նաև երկրի հյուսիսում գտնվող Մազարի Շարիֆ քաղաքի վրա: Բուռն մարտեր սկսվեցին բնակավայրի մատույցներում:

Մինչ այդ գրոհայինները գրավել էին Հերաթը և Կանդահարը՝ երկրի երկրորդ և երրորդ մեծ քաղաքները: Նրանք այժմ վերահսկում են Աֆղանստանի 34 նահանգներից 18-ը, մինչդեռ կառավարությունը վերահսկում է կենտրոնի և արևելքի նահանգների փոքր մասը, ինչպես նաև Քաբուլն ու Մազարի Շարիֆը:

Կառավարական ուժերի և շարժման զինյալների միջև հակամարտության սրումը տեղի է ունենում Աֆղանստանից ամերիկյան ռազմական զորակազմի դուրսբերման ֆոնին: Վաշինգտոնը ծրագրում է իր զորքերը երկրից դուրս բերել մինչև 2021 թվականի սեպտեմբերի 11-ը: Լրատվամիջոցները հայտնում են, որ Քաբուլում ԱՄՆ դեսպանատան ղեկավարությունը դիվանագիտական ծառայությանը հանձնարարել է ոչնչացնել գաղտնի նյութերը`մտավախություն ունենալով, որ դրանք կընկնեն թալիբների ձեռքը:

«Թալիբան»  հաբեկչական կազմակերպության ներկայացուցիչները խոստացել են չգրավել դիվանագիտական օբյեկտները: Նախազգուշական միջոցների շրջանակներում Միացյալ Նահանգներն այնուամենայնիվ որոշել է տարհանել իր քաղաքացիներին Աֆղանստանում գտնվող դեսպանատնից: