Ձեր վստահելի աղբյուրը

«Թալիբան» արմատական շարժման զինյալները 2020 թվականի սկզբից գաղտնի բանակցություններ են վարել Աֆղանստանի անվտանգության ուժերի հետ, որպեսզի նրանք գումարի դիմաց հանձնեն զենքը, հանձնվեն կամ ինքնակամ լքեն բանակը: ՏԱՍՍ-ի փոխանցմամբ, այս մասին կիրակի օրը հաղորդել է The Washington Post-ը:

Ըստ թերթի աղբյուրների, եղել են գործարքներ, որոնք աֆղան պաշտոնյաներն անվանել են «փոխհամաձայնություն հրադադար հասատատելու վերաբերյալ»: Թերթը գրում է, որ իրականում Թալիբանի առաջնորդները գումար են առաջարկել կառավարական ուժերի զենքերը փոխանցելու դիմաց:

Ինչպես հետևում է հրապարակումից, վերջին մեկուկես տարվա ընթացքում թալիբները տարբեր տեսակի համաձայնագրեր են կնքել, մասնավորապես՝ Աֆղանստանի նահանգների ղեկավարների և այլ պաշտոնյաների հետ: Եղել են գրոհայինների հետ  փոխհամաձայնությամբ կառավարական զինված ուժերի հանձնվելու դեպքերի շարք: Հրապարակման մեջ նշվում է, որ այս գործարքները թալիբներին օգնեցին հանրապետության մի շարք նահանգներում վերահսկողություն սահմանել գործնականում առանց որևէ դիմադրության:

«Ոմանք պարզապես ցանկանում էին գումար ստանալ»,-ասել է թերթի աղբյուրը, որը Աֆղանստանի հատուկ ջոկատայինների զինվորներից է:

Աֆղանստանի մյուս քաղաքական և ռազմական ղեկավարները կարծում էին, որ թալիբներն անխուսափելիորեն հաղթանակ կտանեն Աֆղանստանում, և նրանք պատրաստ չէին անցնել շարժման հակառակորդների կողմը: Ըստ թերթի, հանրապետության որոշ ոստիկաններ բողոքում էին, որ ամիսներ շարունակ չեն ստացել իրենց աշխատավարձերը:

«ԱՄՆ-ի և «Թալիբանի» միջև 2020 թվականի փետրվարին խաղաղության համաձայնագրի ստորագրումը բարոյազրկեց Աֆղանստանի անվտանգության ուժերին»,-ասել են աղբյուրները: Նրանք համարել են, որ գրոհայինների դեմ պայքարում այլևս չեն կարող հույս դնել ամերիկյան կողմի ակտիվ աջակցության վրա և այդ պատճառով նրանք ավելի հակված էին թալիբների հետ համաձայնության գալուն:

«Թալիբան» շարժման գրոհայինները, ըստ «Ալ Արաբիա» հեռուստաալիքի, կիրակի օրը առանց կրակոցի մտել են Քաբուլ և սկսել գրավել կառավարական ուժերի լքած պետական հաստատությունները: Աֆղանստանի նախագահ Աշրաֆ Հանին լքեց երկիրը: Ավելի ուշ թալիբները հայտարարեցին Աֆղանստանի մայրաքաղաքի և բոլոր շրջանների վրա վերահսկողություն սահմանելու մասին: