Ձեր վստահելի աղբյուրը

Սևանից հավելյալ ջրառ վերցնելու մասին նախագծի երկրորդ ընթերցման մեկնարկին Ջրային կոմիտեի նախագահ Կարեն Սարգսյանը խորհրդարանում հայտնեց, որ օրինագծի վերաբերյալ միակ առաջարկը եղել է «Պատիվ ունեմ» խմբակցությունից, որով առաջարկվել էր քիչ ջրառ իրականացնել և այն չի ընդունվել:

«Պատիվ ունեմ» խմբակցության պատգամավոր Թագուհի Թովմասյանը տեղեկացրեց, որ իրենց դիմել են բազմաթիվ բնապահպանական կազմակերպություններ, որոնք համոզված են՝ այն կխախտի Սևանի էկոլոգիական վիճակը:

Թովմասյանը Ջրային կոմիտեի նախագահին խնդրեց բացատրել և ավելի հստակ ասել, թե ինչքան  ջուր է անհրաժեշտ:

Պատգամավորը հիշեցրեց, որ Ջրային կոմիտեի նախկին պետերը ԱԺ ամբիոնից հայտնել էին, թե տարի է եղել, որ մոտ 70% ոռոգման ջրի կորուստ են ունեցել և Սարգսյանին հարցրեց, թե ինչ տվյալներ ունի և երաշխիք տալիս է, որ նման կորուստ չի լինի:

Ջրային կոմիտեի նախագահը հայտնեց, որ վերցնում է ցանքի նախորդ տարվա տվյալները և դրան հավելագրում են 10%՝ կանխատեսելով ջրի պահանջը:

«Հայաստան» խմբակցության քարտուղար Արծվիկ Մինասյանն էլ արձագանքեց մինչ այդ Կարեն Սարգսյանի ելույթում իրեն մանիպուլյացիայի մեջ մեղադրելուն:

Ջրային կոմիտեի նախագահը հայտարարել էր, թե 36 հազար հա ջրովի տարածք գոյություն չունի, որի մասին խոսել էր Արծվիկ Մինասյանը:

«Եթե բարի լինեիք և կարդայիք 2018 թվականի օրենքը, ապա կտեսնեիք, որ 36 հազար հա թիվն անգամ օրենքում է ամրագրված»,- Կարեն Սարգսյանին հերքեց Արծվիկ Մինասյանը և հավելեց. «Հետևաբար եթե այս ամբիոնից բաներ եք ասում՝ պատասխանատու եղեք ձեր արտահայտությունների համար»:

Պատգամավորը նաև տեղեկացրեց, որ 2018 թ-ին ընդունվել է Սևանի էկոհամակարգի վերականգնման միջոցառումների վերաբերյալ որոշում, որը գործող իշխանությունը չի կատարել:

Արծվիկ Մինասյանը նաև շեշտեց, որ կրկնում է իր պնդումը՝ նախընտրական շրջանում Սևանից 32 մլն խմ ջուր է բաց թողնվել:

ԱԺ-ն 65 կողմով ձայներով երկրորդ ընթերցմամբ ընդունեց Սևանից հավելյալ 75 մլն մ³ ջրառ կատարելու նախագիծը: