Ձեր վստահելի աղբյուրը

Գորիսի փոխքաղաքապետեր Իրինա Յոլյանի և Մենուա Հովսեփյանի պաշտպաններն ինքնաբացարկի միջնորդություններ են ներկայացրել դատավորներ Կարեն Ֆարխոյանին և Մնացական Մարտիրոսյանին: Պաշտպան Արմեն Մելքոնյանը լրագրողների հետ զրույցում ասաց, որ ներկա պահին երկու դատավորներն էլ գտնվում են խորհրդակցական սենյակներում որոշում կայացնելու:

«Պաշտպանական թիմը գտնում է, որ այս պահին երկուսն էլ օրենքով սահմանված դատարան չեն:
Խնդիր կա քրեական գործի մակագրման հետ կապված, մակագրման փոխարեն անհայտ կայքով ինչ-որ նշան է ուղարկված: Լուրջ կասկածներ ունենք, որ սա Երևան քաղաքի ընդհանուր իրավասության դատարանի նախագահի կողմից արված չէ, հակառակ դեպքում չգիտես  ինչ որ զուգադիպությամբ հենց նույն դատավորներին է այս գործերը մակագրվում»,- ասաց պաշտպանը:

Նա նշեց՝ երբ հարց են տալիս ի՞նչ կարգով է մակագրվել, ասում են՝ օրենքով սահմանված կարգով,  երբ  խնդրում են պարզաբանել ո՞ր օրենքով, մարդիկ չեն կարողանում պարզաբանել, դատավորը չգիտի՝ որ օրենքի սահմանված կարգով է իրեն մակագրվել:

Հիշեցնենք, որ Գորիսի փոխքաղաքապետեր Իրինա Յոլյանը, Մենուա Հովսեփյանը ձերբակալվել են երեկ: Այսօր դատարաններում քննվում է նրանց կալանավորման հարցը:
Նրանց մեղադրանք է առաջադրվել Քրեական օրենսգրքի 179 հոդվածի 3-րդ մասի 1-ին կետի հատկանիշներով, Մենուա Հովսեփյանին նաև 149.1 հոդվածի 2-րդ մասի 1-ին և 2-րդ կետերի հատկանիշներով: