Ձեր վստահելի աղբյուրը

Կառավարությունն այսօրվա հերթական նիստը սկսեց «ՀՀ կառավարության 2021-26 թվականների գործունեության ծրագրի» քննարկմամբ:

Նիկոլ Փաշինյանը հայտնեց, որ Սահմանադրության 151 հոդվածի համաձայն կառավարությունն իր ձեևավորումից հետո 20-օրյա ժամկետում պետք է խորհրդարանի հաստատմանը ներկայացնի գործունեության ծրագիրը և տեղեկացրեց, որ հաջորդ շաբաթվա սկզբում այն կքննարկվի ԱԺ-ում:

Նրա խոսքով, ծրագիրը բաղկացած է 6 բաժնից՝ «Անվտանգություն և արտաքին քաղաքականություն», «Տնտեսություն», «Ենթակառուցվածքների զարգացում», «Մարդկային կապիտալի զարգացում», «Իրավունք և արդարադատություն», «Ինստիտուցիոնալ զարգացում»:

Փաշինյանը հայտնեց, որ կառավարության հիմնական քաղաքական ուղերձն ընդգրկված է ծրագրի նախաբանում և ընթերցեց այն. «…Հայաստանի Հանրապետությանը սպառնացող բազմաթիվ արտաքին և ներքին մարտահրավերներ մնում են չհաղթահարված: 2020 թվականի 44-օրյա պատերազմի ծանր հետևանքներն էականորեն փոխել են Հայաստանի արտաքին միջավայրը՝ ոչ միայն սրելով նախկինում գոյություն ունեցած մի շարք մարտահրավերներ, այլև առաջ բերելով նորերը: Հայաստանի արտաքին անվտանգության, ինքնիշխանության, տարածքային ամբողջականության պաշտպանությունը, Լեռնային Ղարաբաղի հիմնախնդրի արդարացի լուծումը, Հայաստանի շուրջ տարածաշրջանային և միջազգային բարենպաստ մթնոլորտ ստեղծելը շարունակում են մնալ առաջնային: …Հայաստանի և տարածաշրջանի համար խաղաղ զարգացման դարաշրջան բացելը, այնուամենայնիվ, արտահերթ ընտրությունների արդյունքներով ժողովրդի առաջ Կառավարության ստանձնած մեծագույն առաքելությունն է: Կառավարությունը գիտակցում է, որ այս խնդրի լուծումը միայն Հայաստանի Հանրապետությունից չի կախված, այլև տարածաշրջանի մյուս երկրների կեցվածքից և ցանկությունից: Հայաստանի Հանրապետության կառավարությունը ստանձնում է տարածաշրջանի համար խաղաղ զարգացման դարաշրջան բացելու իր բաժին անելիքն ու պատասխանատվությունը»:

Նրա խոսքով, Հայաստանի անվտանգության կարևորագույն գործոններից են «հայ-ռուսական ռազմավարական դաշինքը, ՀՀ-ի անդամակցությունը ՀԱԿՊ-ին, տարածաշրջանային կայուն միջավայրի ձևավորումը և ենթակառուցվածքների ապաշրջափակումը»: 

Ամբողջովին շրջանցելով օրինակ Սև լճի շրջանում ՀՀ սահմաը հատած ու արդեն արմատներ գցող թշնամի ադրբեջանական զորքի մասին, Փաշինյանը խոսեց 2021-26 թթ. ծրագրային «ապագայից». «ՀՀ սահմանապահ զորամասերն ավելի ու ավելի շատ տեղամասեր կընդունեն ՀՀ զինված ուժերից, այսինքը՝ սահմանապահ ծառայության պատասխանատվության տարածքները կընդլայնվեն և սահմանապահ զորքերն էլ պետք է ընդլայնվեն»։ 

Ի դեպ, Փաշինյանի կարծիքով՝  սովորաբար սահմանապահները ստանձնում են այն տեղամասերի պատասխանատվությունը, որը համարվում է ոչ պատերազմական գոտի:

Այնուհետև նա անցավ ավելի «ապագայի» 2050 թ. ռազմավարությանը և որ՝  առաջիկա 5 տարիներին Հայաստանում կստեղծվի արտաքին հետախուզական ծառայություն:

Դասագրքային մասերից՝  «անվտանգության կարևորագույն գործոն է նաև տնտեսական զարգացումը և սոցիալական կայունությունը»:

«Դիվանագիտական» մասերից՝  հայտարարեց, որ կառավարության ծրագրի անվտանգության բաղադրիչներն այնպես է ձևակերպված, որ դրանք համահունչ լինեն ԵԱՀԿ մինսկի խմբի՝ արցախյան հակամարտության քաղաքական կարգավորման օրակարգին: