Ձեր վստահելի աղբյուրը

Դատական համակարգի վերաբերյալ կոռեկտ արտահայտվելու մասին Բարձրագույն դատական խորհրդի կոչն առավել կոնկրետ ուղղված էր իշխանական պատգամավորներին։ Լրագրողների հետ զրույցում նման կարծիք հայտնեց փաստաբան Երվանդ Վարոսյանը:

«Կոչը շատ դրական եմ գնահատում, քանի որ այն համարում եմ ուղղված գործադիր իշխանությանը և իշխանական պատգամավորներին։ Ես տեքստից այդպես հասկացա: Իհարկե, մի փոքր ուշացած էին նման կոչերը:

Այդ կոչերով Բարձրագույն դատական խորհուրդը դեռ երեք տարի առաջ պետք է հանդես գար, երբ իշխանությունները ոչ միայն խոսքով, այլ նաև գործով էին խոչընդոտում դատարանի աշխատանքները, սպառնալիքներ էին հնչեցնում դատավորների նկատմամբ և շրջափակում էին դատարանների դռները։ Ես հասկացել եմ, որ այդ կոչն ուղղված է այն անձանց, ովքեր իրականում խոչընդոտում են դատարանների աշխատանքները»,- ասաց Ե.Վարոսյանը։

Ըստ նրա, դատարանների հանդեպ վստահության ամրապնդման առումով շատ հստակ անելիքներ կան, առաջին հերթին պետք է շտապ դատարաններ վերադարձնել մակագրություն իրականացնող համակարգիչները։

«Այդ համակարգիչների տեղափոխումը դատարաններից և մակագրումը ձեռքով իրականացնելը ես համարում եմ կոնկրետ դատական իշխանության դեմ ուղղված քայլը։

Ակնհայտ է, թե ովքեր են մակագրողները, ովքեր են եղել մակագրողները վերջին 20-30 տարիների ընթացքում։ Նրանք միշտ են հանդես եկել պրո-իշխանական դիրքերից՝ անկախ նրանից, թե ով է եղել իշխանության, այդ մարդկանց ձևն է այդպես։

Տեսնում ենք, թե քաղաքական իշխանության համար հետաքրքրություն ունեցող գործերն ում են  մակագրվում, էլի տասնամյակներ շարունակ պատվեր կատարող դատավորների, ուստի՝ ինչպե՞ս վստահել»,- ասաց նա։

Ե. Վարոսյանը չի կարծում, որ Բարձրագույն դատական խորհուրդն է եղել այն մարմինը, ով  նախաձեռնել է համակարգչի անհետացումը, չի էլ կարծում, որ ԲԴԽ-ն կարող է այդ հարցում որևէ ազդեցություն ունենալ:

«Ով հրամանը տվել է, նա էլ պետք է հրամանը տա հետ վերադարձնել։ Փոքր դետալ է այդ համակարգիչը, բայց քաղաքական իշխանությունը կունենա կամք ունենալ անկախ դատական համակարգ, մենք կունենանք, չի ունենա այդ կամքը, մենք այդ դատական համակարգը չենք ունենա»,- ասաց փաստաբան Երվանդ Վարոսյանը։

Նա նշեց, որ դատական համակարգին միշտ էլ եղել է միջատություն, գրեթե միշտ է այդպես եղել, ուղղակի երբեք իշխանություններն իրենց թույլ չեն տվել այդ ամեն ինչը ներկայացնել բաց ու հրապարակային:

«Միշտ իմացել ենք ճնշումների, զանգերի մասին: Բայց նախկին իշխանություններն իրենց հայտարարություններում ու գործողություններում զգույշ էին, վախենում էին հասարակությունից, ունեին որոշակի կաշկանդվածություն: Սրանք որևէ բանից որևէ կաշկանդվածություն չունեն, բացահայտ ասում են, անում են ու մարսում են»,- ասաց Երվանդ Վարոսյանը: