Ձեր վստահելի աղբյուրը

Այսօր Բարձրագույն դատական խորհրդում կայացել է Երևան քաղաքի Առաջին ատյանի ընդհանուր իրավասության դատարանի դատավոր Արման Հովհաննիսյանին կարգապահական պատասխանատվության ենթարկելու վերաբերյալ միջնորդության քննությունը: ԲԽԴ-ից հայտնում են, որ միջնորդությունը Խորհրդին է ներկայացրել արդարադատության նախարարի պաշտոնակատարը՝ նշելով, որ դատավորի կողմից թույլ է տրվել դատավարական խախտում, որն էլ առաջ է բերել դատավորի վարքագծի կանոնների խախտում:

Դատավոր Արման Հովհաննիսյանը միջնորդել է իրեն կարգապահական պատասխանատվության ենթարկելու վերաբերյալ վարույթը կարճել, քանի որ գտնում է՝ վարույթի հարուցման հիմքերն օրինականության խնդիր ունեն:

ԲԴԽ-ն միջնորդությանը ծանոթանալու համար, տեղում խորհրդակցելով, որոշել է նիստը հետաձգել մինչև սեպտեմբերի 2-ը, ժամը՝ 15.00:

Նիստից հետո լրագրողների հետ զրույցում Արման Հովհաննիսյանը կարծիք հայտնեց, որ պետք է այդ վարույթը կարճվի:

«Գտնում եմ, որ ես հիմնավոր միջնորդություն եմ ներկայացրել։ ԲԽԴ-ն 2020 թվականի հուլիսի 13-ին նմանատիպ դիրքորոշում է հայտնել ու կարճել վարույթը»,- ասաց դատավորը:

Նա գտնում է, որ դատավորի կայացրած որոշման, իր մտքերի, մոտեցումների, վերլուծությունների համար կարգապահական վարույթ հարուցելը սխալ է, որովհետև դա ուղիղ կաշկանդում է դատավորին։

«Դատավորն իր որոշման համար չպետք է ենթարկվի պատասխանատվության: Այլ բան է՝ կարող է ինչ-որ ծայրահեղ իրավիճակ լինել, դատավորն իր որոշման մեջ այնպիսի նորմի հղում տա, որն այլևս գոյություն չունենա։ Երբ խոսք է գնում դատավորի մոտեցման, դիրքորոշման, դրա արդյունքում կարգապահական վարույթի, ապա ես սխալ եմ համարում»,- ասաց դատավորը:

Հարցին՝ կարո՞ղ  են արձանագրել, որ նմանատիպ վարույթներն ուղիղ միջամտություն են  դատարանների անկախությանը,  Ա. Հովհաննիսյանը պատասխանեց. «Այո: Ես իմ միջնորդության մեջ նշեցի, որ  սա ուղիղ միջամտություն է դատավորի անաչառ աշխատանքին, անկախության  սկզբունքն է խախտվում»: