Ձեր վստահելի աղբյուրը

Արցախի պատերազմի հետևանքով անհետ կորած զինծառայողների հարազատները պետական մարմիններին, Ազգային անվտանգության ծառայությանը մեղադրում ենք անգործության, բարոյալքված լինելու համար։

«Մեզ մոտ տպավորություն է, որ Հայաստանի կառավարությունը նեղանում է մեզանից, որ բողոքի ակցիաներ են իրականացնում»,-ասաց անհետ կորած զինծառայողի հարազատը։

ԱԱԾ շենքի դիմաց բողոքի ակցիա իրականացնող անհետ կորածների հարազատները մուտք գործեցին ծառայության շենք, հայտարարեցին՝ չեն հեռանա, քանի դեռ չեն հանդիպել ԱԱԾ տնօրեն Ա. Աբազյանի հետ։

«Ընդունեք մեզ, մենք այստեղից չենք գնալու։ Սա միակ քայլ է, որ այս պահին կարող ենք անել»,-ասացին նրանք։

ԱԱԾ շենքի առաջին հարկում հարազատներին խնդրեցին դրսում սպասել, նրանք դուրս չեկան շենքից։

«11 ամիս սպասել ենք։ Մեր ծնողների մեծ մասը համեստ մարդիկ են։ Անձամբ մենք ենք տեղեկություններ հավաքել, ասել ենք, տեսեք, այստեղ մարմիններ կան, ո՞ւր են տեղափոխվել։ Հիշո՞ւմ եք, մի խոսակցություն եղավ, որ հայկական կողմին պետք է փոխանցվեն 50-60 մարմիններ, ո՞ւր են նրանք, որտե՞ղ են այդ մարմինները։ Մենք էլ համբերություն չունենք, էսօր ոչ մեկի պետքը չէ մեր ցավը»,-ասաց հարազատներից մեկը։

Ծնողներից մեկն էլ լրագրողներին ներկայացրեց Փաշինյանի հայտարարությունը.

«Մեզ հետ վերջին հանդիպմանը նա զարմանալի հայտարարություն արեց։ Ասաց՝ հնարավոր է, որ մեր երեխաներն Ադրբեջանում լինեն, գերեվարված, բայց որ չեն տալիս, ես ի՞նչ անեմ։ Նա օրինակ բերեց գրիչը, գրիչը գրպանում է, ես ասում եմ՝ տուր,  պատասխանում է՝ գրիչ չունեմ։ Ես ասում եմ՝ և ի՞նչ։ Նա պատասխանում է՝ «և վերջ»։ Վարչապետի պատասխանն է։

ԱԱԾ-ից հարազատներին խոստացել են, ընթացող խորհրդակցության ավարտից հետո Արմեն Աբազյանը կհանդիպի նրանց հետ։