Ձեր վստահելի աղբյուրը

Ազատության հրապարակում երևանցիների երեկոյան զբոսանքը կարող է ավարտվել մարմնական վնասվածքներ ստանալով։ Քաղաքային իշխանության թողտվությամբ հրապարակը վերածվել է մրցուղու, որտեղ մեծ արագությամբ աջ ու ձախ ընթանում են էլեկտրական հեծանիվներ, մեքենաներ, մոպեդներ, մոտոցիկլետներ ու մարտկոցով աշխատող այլ անիվավորներ։

Խմբագրությունը վերջին քսան օրվա ընթացքում երկու ահազանգ է ստացել։ Առաջին դեպքում երեխայի հետ զբոսնող մայրն էր վթարի ենթարկվել, ինչի հետևանքով պատռվել էր հագուստն ու  վնասվել ոտքը։ Երկրորդ ահազանգը եղել է «Հայկյան» մրցանակաբաշխության օրը՝ օգոստոսի 7-ին, երբ համերգից հետո հրապարակում զբոսնելու ժամանակ սրընթաց մեքենան հարվածել էր երեխային։ Բարեբախտաբար, լուրջ վնասվածք երեխան չէր ստացել։ Օգոստոսի 18-ին հրապարակում մասնագիտական աշխատանքի ընթացքում մեքենաներից մեկն էլ դիպել էր խմբագրության լուսանկարչին։

Ովքե՞ր են այս տնտեսվարողները, ի՞նչ իրավական հիմքով են նման գործունեություն ծավալում ակադեմիական թատրոնի տարածքում, ի՞նչ քայլեր են ձեռնարկում քաղաքային իշխանությունները երեկոյան Երևանը վայլելու դուրս եկած քաղաքացիների անվտանգությունն ապահովելու համար, ինչո՞ւ կասեցվեցին Ազատության հրապարակի «մաքրման» աշխատանքները։

Panorama.am-ն այս հարցերն ուղղեց Երևանի քաղաքապետ Հայկ Մարությանին, Կենտրոն վարչական շրջանի ղեկավար Ավետ Պողոսյանին։

Քաղաքապետարանից ստացած պատասխաններից եփած հավի ծիծաղն էլ կգա։

«Ազատության հրապարակում գործունեություն ծավալողների մասին տեղեկություններ չկան, քանի որ 2021թ-ի հուլիսի 1-ից Ազատության հրապարակում որևէ տնտեսվարողի հեծանիվների կամ մանկական ավտոմեքենաների վարձույթի գործունեություն իրականացնելու թույլտվություն չի տրվել»,- տեղեկացնում են Կենտրոն վարչական շրջանի աշխատակազմի առևտրի բաժնից։

Ստացվում է, որ Երևանի կենտրոնում ապօրինի տնտեսական գործունեություն է իրականացվում։ Հրապարակում առնվազն հինգ կետ կա, որտեղից նման մեքենաներ ու հեծանիվներ կարելի է վարձակալել, վարձույթի գինն էլ տատանվում է 1000-2000 դրամի սահմաններում 5-10 րոպե դրանք վարելու համար։

Մեկժամանոց պտույտի ընթացքում կարելի է հաշվել, թե այդ ընթացքում ինչ կլորիկ գումարներ են աշխատում վարձույթի կետի տերը կամ տերերը։ Ասում են, որ երկու տարի առաջ այս ապօրինի բիզնեսից մասնաբաժին ուներ ոստիկանության բարձրաստիճան մի պաշտոնյա, հիմա ո՞ւմ գրպանն է գնում այդ գումարը, չգիտենք։ Կենտրոնի թաղապետարանից էլ ասում են՝ տեղյակ չեն, բայց տրամաբանությունը հուշում է, որ իշխանամերձ շրջանականերից է, հակառակ դեպքում  ուղղակի աշխատելու «դաբրո» չէր լինի, ավելին «ասֆալտին փռելու» օպերացիա իրականացրած կլինեին։

Քաղաքապետարանի լրատվության վարչության պետ Հովսեփ Կուբատյանն այս տարվա հուլիսի 12-ին ֆեյսբուքյան էջում գրել էր, որ Ազատության հրապարակի «մաքրման» աշխատանքները շարունակվում են և շարունակվելու են այնքան ժամանակ, մինչև հրապարակը ամբողջովին չազատվի մեքենաներից, հեծանիվներից և զվարճանքի այլ պարագաներից: 

Այսօր՝ օգոստոսի 20-ի դրությամբ հրապարակում կան մեքենաներ, հեծանիվներ ու այլ պարագաներ։

«Ինչո՞ւ չշարունակվեցին հրապարակի «մաքրման» աշխատանքները»,- հարց էինք ուղղել  Հայկ Մարությանին։

«Ազատության հրապարակից վերջին անգամ օգոստոսի 12-ին է հեռացվել թվով 8 էլեկտրական մոպեդ, իսկ ընդհանուր առմամբ հեռացվել են 40-ից ավելի հեծանիվներ և մանկական ավտոմեքենաներ, որոնք մինչ օրս գտնվում են Երևանի քաղաքապետարանի պահեստային տարածքում:

Ինչ վերաբերում է Ազատության հրապարակում դեռևս առկա հեծանիվներին և մանկական ավտոմեքենաներին, ապա հայտնում ենք, որ շատ հաճախ քաղաքացիները նշված տարածքում վարում են իրենց անձնական տրանսպորտային միջոցները»,- ասված է Երևանի քաղաքապետարանի աշխատակազմի առևտրի և ծառայությունների վարչության պատասխանում, որը վկայում է անտեղյակության ու իրականությունից կտրված լինելու մասին։

Պատասխանը ստանալուց հետո Panorama.am-ի թղթակիցները կրկին եղան Ազատության հրապարակում։ Պարզվեց՝ Հայկ Մարությանը չի տիրապետում իրավիճակին։ Ինչպես ժողովուրդն է ասում, կամ Մարությանին են էշի տեղ դնում, կամ նա է փորձում էշի տեղ դնել։ Իսկ եթե քաղաքապետն իսկապես անտեղյակ է անցուդարձին, ապա հիշեցնենք, որ Թումանյանը մի լավ գործ ունի՝ «Թագավորն ու չարչին», Ազատության հրապարակից մի քանի քայլ այն կողմ՝ Հյուսիսային պողոտայում ապրող Հայկ Մարությանը կարող է չարչու կերպ մտնել, հրապարակ գնալ ու սեփական աչքերով տեսնել առկա իրավիճակը։ Հակառակ դեպքում կասկած կարելի է հայտնել, որ նա էլ այդ անձեռնմխելի բիզնեսից մասնաբաժին ունի։

«Ի՞նչ է անում քաղաքային իշխանությունը Երևանի կենտրոնում զբոսնող քաղաքացիների անվտանգության ապահովման համար»,- հարցրել էինք քաղաքապետին։

«Քաղաքացիների անվտանգության նկատառումներից ելնելով Երևանի քաղաքապետարանի աշխատակիցները շարունակում են սահմանել հերթապահություն և կատարել կանխարգելիչ միջոցառումներ՝ նշված տարածքում հեծանիվների և մանկական ավտոմեքենաների վարձույթի գործունեության իրականացումը բացառելու ուղղությամբ»,- պատասխանել են քաղաքապետարանից։

Քաղաքապետարանի այս պատասխանն էլ ծաղր է հիշեցնում, «վթարի» ենթարկված քաղաքացիները տուժել են այդ կանխարգելիչ միջոցառումների բացակայության, էլ չենք ասում քաղաքապետարանի անգործության հետևանքով, ավելին՝ Ա. Սպենդիարյանի անվան օպերայի և բալետի ազգային ակադեմիական թատրոնի հարակից տարածքում հենց այս պահին էլ կարելի է մեքենաներ, հեծանիվներ, մոպեդներ վարձել։ Ի դեպ, աշխատակիցներն ազնվորեն ասում են, զգույշ կլինեք՝ շատ արագ են։

Panorama.am-ը հետևողականորեն անդրադառնալու է այս խնդրին, նաև հարցում է ուղարկելու ՊԵԿ, թե ովքե՞ր են այդտեղ գործունեություն ծավալող տնտեսվարողները, ինչքա՞ն հարկ են վճարում, իսկ եթե վաձույթի գործունեություն իրականացնելու թույլտվություն չի տրվել, ինչպես պնդում են Կենտրոն վարչական շրջանից, ինչո՞ւ չի դադարեցվում ապօրինի գործունեությունը։ Եվ ի վերջո, մարդիկ հրապարակ գնում են ճեմելու, զբոսնելու, ոչ թե էքստրիմ իրավիճակներում հայտնվելու, վնասվածքներով տուն վերադառնալու համար։

Լուսանկարներն Ազատության հրապարակում արվել են օգոստոսի 18-ին և 19-ին։