Ձեր վստահելի աղբյուրը

Աֆղանստանի նախկին իշխանությունների որոշ ներկայացուցիչների ընտանիքի անդամները հայտնում են, որ իրենց հարազատները անհայտ կորած կամ կալանավորված են թալիբների կողմից: Այդ մասին հայտնում է «Ինտերֆաքս»-ը:

Tolo հեռուստաալիքի փոխանցմամբ՝ թալիբները ձերբակալել են Աֆղանստանի Լագման նահանգի նախկին նահանգապետին և ոստիկանության նախկին պետին, Հազնի նահանգի նախկին ոստիկանապետը նույնպես անհետացել է:

«The New York Times»-ը նախօրեին, վկայակոչելով իր մոտ հայտնված ՄԱԿ-ի փաստաթուղթը, հաղորդում է, որ թալիբներն ուժեղացրել են Աֆղանստանում ամերիկյան և բրիտանական ուժերին օգնություն ցուցաբերածների որոնումները: Ըստ թերթի՝ թալիբներն ունեն այն մարդկանց ցուցակը, որոնց նրանք փնտրում են «հարցաքննության և պատժի համար»:

Պարբերականը նշում է, որ գրոհայինները սպառնում են սպանել կամ ձերբակալել որոշ անձանց ընտանիքի անդամներին, եթե նրանք ինքնակամ չեն հանձնվում թալիբներին:

Մինչդեռ, ավելի վաղ «Թալիբան» շարժման ներկայացուցիչը Զաբիուլլահ Մուջահիդը հայտարարել էր, որ ԱՄՆ-ի և նրա դաշնակիցների հետ Աֆղանստանում համագործակցող բոլոր աֆղաններին համաներում կհայտարարվի և նրանց կոչ էր արել չլքել երկիրը:

Թալիբանի առաջնորդները երեքշաբթի համընդհանուր համաներում էր հայտարարել: «Հայտարարվում է համընդհանուր համաներում: Դուք կարող եք ապրել սովորական կյանքով լիակատար վստահության մթնոլորտում»,-ասված էր թալիբների տարածած հայտարարության մեջ:

Նրանք նաև քաղաքացիական ծառայողներին խնդրել էին վերադառնալ իրենց աշխատանքին և շարունակել աշխատել սովորական ռեժիմով: