Ձեր վստահելի աղբյուրը

«Հեղափոխությունից հետո մարդիկ մտածում էին, որ մարդու իրավունքներն այլևս չեն ոտնահարվելու, այնինչ այդպես չեղավ»,- հայտնեց ԱԺ նախկին պատգամավոր Անի Սամսոնյանը  Մարդու իրավունքների պաշտպանության և հանրային հարցերի մշտական հանձնաժողովի նախկին նախագահների և Մարդու իրավունքների նախկին պաշտպանների հետ ԱԺ-ում կազմակերպված հանդիպման ժամանակ:

Հանդիպումը նախաձեռնել է ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը:

Անի Սամսոնյանի խոսքով, մարդու իրավունքի եղած խնդիրներին ավելացել են նաև 2020 թվականի պատերազմի հետևանքները՝ անվտանգության և հուսալքության խնդիրները:

«Մարդու իրավունքները և նրանց անվտանգությունն իրար հակադրելը սխալ է, դրանք խիստ փոխկապակցված են»,- ասաց նախկին պատգամավորը՝ շեշտելով, որ ներկայում մարդու իրավունքների ոլորտում կան հարցեր, որոնց մի մասը պատերազմի հետևանք են, իսկ մյուսները ոլորտային են:

Ըստ Անի Սամսոնյանի՝ վերջին երեք ամիսներին հանրության ուշադրությունից դուրս է մնացել ռազմագերիների հարցը:

«Դուք գիտեք, որ մենք ունենք մի իշխանություն, որի վրա որքան մեծ է լինում հանրային ճնշումը՝ այն էլ սոցիալական ցանցերի միջոցով, այնքան հարցերն ավելի արագ են լուծվում»,- ասաց Սամսոնյանը և ԱԺ մշտական հանձնաժողովին կոչ արեց հարցը մշտապես ուշադրության կենտրոնում պահել:

«Լուսավոր Հայաստան» խմբակցության նախկին պատգամավորը հայտնեց, որ պատերազմի մասնակիցներին հոգեբանական աջակցություն ցուցաբերելու և վերականգնողական թերապիայի մասին ժամանակին խոսել է, բայց այն համապատասխան ուշադրության չի արժանացել:

«Եթե հարցում անեք ոստիկանությանը, ապա կտեսնեք, որ պատերազմից հետո ինքնասպանության զգալի մասն արել են պատերազմի մասնակիցները»,- հայտնեց Սամսոնյանը և հավելեց, որ դրա պատճառն իրենց հոգեբանական խնդիրների մեջ է:

Նախկին պատգամավորը նաև տեղեկացրեց, որ այդ հարցերի մասին փորձել է խոսել Աշխատանքի և սոցիալական հարցերի նախկին նախարար Մեսրոպ Առաքելյանի հետ, բայց վերջինս չի հասկացել իր բարձրացրած խնդրի լրջությունը:

Անի Սամսոնյանը Թագուհի Թովմասյանին հորդորեց ուշադրության ներքո պահել այդ հարցը, ինչպես նաև՝ քրեակատարողական հաստատություններում տիրող վիճակը: