Ձեր վստահելի աղբյուրը

«Հիմա Ազգային ժողովի ամբոինին կանգնած անձնավորությունն իր հետ դահլիճ է բերել ախրանիկներ, որոնք երբևէ Ազգային ժողով չեն մտել…»,- ԱԺ նիստի ժամանակ ասաց «Պատիվ ունեմ» դաշինքի անդամ Աննա Մկրտչյանը:

Նշենք, որ այդ պահին ԱԺ ամբիոնի մոտ կանգնած էր Նիկոլ Փաշինյանը, ով կառավարության հնգամյա ծրագիրը ներկայացնելուց հետո պատասխանում էր պատգամավորների հարցերին:

ԱԺ նախագահ Ալեն Սիմոնյանը դիմեց տիկին Մկրտչյանին՝ նախազգուշացնելով…

Դահլիճից լսվեցին ձայներ:

«Կապիտուլյանտների կողմից ձայնը…»,-  ասաց Աննա Մկրչտյանը:

Ալեն Սիմոնյանը լռության կոչ արեց. «Անջատեք տիկին Մկրտչյանի բարձրախոսը: Հրաչյա Հակոբյան նախազգուշացում, հաջորդ անգամ ձեզ դուրս կհրավիրեմ: Լռություն: Պարոն Սուքիասյան: Պարոն Եղոյան Նախազգուշացում: Բաքոյան: Տիկին Մկրտչյան, մի ստիպեք ձեզ զրկեմ խոսքի իրավունքից: Դուք հարց չէիք տալիս, սադրում էիք, ես այդպես ճիշտ գտա: Վերջին անգամ եմ զգուշացնում, խնդրում եմ ձեզ մի ստիպեք… Վերջացրեք:

Մեկ նիստի ընթացքում խոսելու իրավունքից զրկում եմ ձեզ»: 

Նիկոլ Փաշինյանը չարձագանքեց ընդդիմադիր պատգամավոր դիտարկմանը՝ նշելով, որ  իրեն ուղղված հարց չի հնչել, արձագանքելու անհրաժեշտություն չկա:

Հաջորդ հարցը տվեց «Պատիվ ունեմ» դաշինքի անդամ Տիգրան Աբրահամյանը:

«Նախ առաջինը կուզենայի լսել ձեր վերաբերմունքը ձեր թիմակիցների կողմից հնչող ռեպլիկների վերաբերյալ»,- դիմելով ամբիոնին կանգնած Փաշինյանին՝ ասաց Աբրահամյանը:

Նիկոլ Փաշինյանը պատասխանեց. «Իմ կարծիքով բավականին զուսպ, նույնիսկ մեղմ են արձագանքում»:

Դահլիճում կրկին աղմուկ բարձրացավ:

«Ես հեռացնում եմ ձեզ, տիկին Մկրտչյան, նիստերի դահլիճից, տվյալ օրվա ավարտը: Լքեք դահլիճը, այլապես ստիպված կլինեմ անվտանգության աշխատակիցներին խնդրել ձեզ հեռացնեն դահլիճից»,- ասաց Ալեն Սիմոնյանը:

Այնուհետև անվտանգության աշխատակիցներին հրավիրեց՝ տիկին Մկրտչյանին ուղեկցելու դուրս: 

«Դուք չեք կարող…»,- ասացին ընդդիմադիր պատգամավորները:

«Դա հետո կքննարկեք, թե ես ինչ կկարողանամ»,- նշեց Սիմոնյանը՝ հայտարարելով 20 րոպե ընդմիջում: