Ձեր վստահելի աղբյուրը

«Ի՞նչ եք մտածում՝ երբ եք պատրաստվում վերջ տալ Ազգային ժողովի այս ազատազրկմանը, այս կապիկությանը»,- այս հարցն ԱԺ-ում Նիկոլ Փաշինյանին ուղղեց «Հայաստան» խմբակցության անդամ Աղվան Վարդանյանը:

Նա նշեց, որ երեկ առավոտյան եկել է ԱԺ, ամեն ինչ խաղաղ էր, ընդամենը 1-2 ոստիկան է եղել տարածքում:

«Այսօր  պատկերը բոլորովին այլ էր՝ հարյուրավոր ոստիկաններ, հարյուրավոր զինվորներ, ամեն քայլափոխի ավտամոտավորները, ՊՊԾ ամբողջ ղեկավարությունը: Ի՞նչն է տարբերություն: Երեկ դուք չկայիք, այսօր, կարծեմ, այստեղ եք: Սա ի՞նչ թատրոն է, ինչի՞ց եք վախենում: Վախ չափելու բազմաթիվ ձևեր կան: Ազգային ժողովի դարպասները բացել էիք, տարածքն իբր վերադարձրել քաղաքացիներին: Ի՞նչ է փոխվել:

Իսկ այն, ինչ տեղի ունեցավ այսօր այս դահլիճում, իրոք, հանցագործություն է, անօրինականություն է: Ազգային ժողովը որպես պետական ինստիտուտ, իմ տպավորությամբ, փաստացի ազատազրկվել է պատգամավորներով, լրագրողներով»,- Փաշինյանին ուղղված հարցում՝ ասաց Ա. Վարդանյանը:

Նիկոլ Փաշինյանն արձագանքեց. «Հայաստանի կառավարությունը ստացել է շատ հստակ մանդատ ու առանց սեթևեթանքների այդ մանդատն իրագործելու է: Հայաստանում պետական ինստիտուտները, ժողովրդի իշխանությունը, ժողովրդի մանդատը պաշտպանված է լինելու՝ ուզում է դուր գալ որևէ մեկին, ուզում է դուր չգա»:

Ա. Վարդանյանը մեկ այլ հարցով դիմեց Ն.Փաշինյանին. «Եթե ձեզ ասեին, որ 2018 թվականին ձեր իշխանության գալը այսպիսի աղետալի հետևանքներ է ունենալու Արցախի ու Հայաստանի համար, դարձյալ կգնայի՞ք իշխանության թավշյա բռնազավթման»:

Փաշինյանն ասաց. «Պարոն Վարդանյան, եթե, ասեին… Իսկ դուք համոզվա՞ծ եք, որ վստահ գիտեք, թե ինչ էր տեղի ունենալու եթե 2018 թվականի ոչ բռնի թավշյա հեղափոխությունը տեղի չունենար: Եթե դուք  գիտեք, թե ինչ էր տեղի ունենալու, ասեք:

Ես գիտեմ, թե ինչ էր տեղի ունենալու. և բանակցային բովանդակության, և բանակում տեղի ունեցած պրոցեսների մասին հայտարարել եմ մի քանի անգամ»: