Ձեր վստահելի աղբյուրը

«Գեղարքունիքի մի շարք բնակավայրերի ջրամատակարարումը սնուցող ջրամբարում, որի ջուրը ներկայում դատարկված է, այժմ գտնվում է ադրբեջանցիների վերահսկողության տակ, դրան այլընտրանքային տարբերակ մշակվե՞լ է»,- կառավարության 2021-26 թթ. գործունեության ծրագիրը ներկայացնելու ժամանակ Նիկոլ Փաշինյանին հարցրեց «Պատիվ ունեմ» խմբակցության պատգամավոր Թագուհի Թովմասյանը:

Պատգամավորը նաև տեղեկացրեց, որ Կութ համայնքից ադրբեջանական զինված ուժերի ներկայացուցիչները մոտ 80 գլուխ անասուն են հափշտակել և մինչև հիմա չեն վերադարձրել:

«Քննարկում ենք կառավարության ծարգիրը, խոստումներ և տեսլական եք ներկայացնում և ստացվում է, որ տարրական անվտանգային և մարդկանց կյանքի իրավունքը չեք կարողանում պահպանել և չեք կարողանում մարդկանց սեփականության իրավունքը պաշտպանել»,- հայտարարեց Թովմասյանը:

Նիկոլ Փաշինյանն ընդունեց Թովմասյանի բարձրացրած հարցերի տրամաբանությունը, տեղեկացրեց, որ հակամարտության ընթացքում հազարավոր անասուններ են հափշտակվել, հարյուրավոր քրեական գործեր են հարուցվել, որոնց մի մասը չի բացահայտվել:

«Երբ մենք խոսում ենք տարածաշրջանում խաղաղ զարգացման դարաշարջան բացելու մասին, խոսում ենք ձեր առաջ քաշած օրակարգը սպասարկելու մասին»,- հայտարարեց Փաշինյանը և խոստացավ, որ Այգեպարի նման փոխհատուցելու է մյուս տուժած համայնքներին:

Կառավարության ղեկավարը չանդրադարձավ անվտանգային խնդիրներին՝ պնդելով, որ իր ելույթում այդ մասին արդեն բարձրաձայնել է:

Թագուհի Թովմասյանը շեշտեց, որ կա սահմանամերձ բնակավայրերում ապրող մարդկանց անվտանգության, կյանքի իրավունքի խնդիր և դեռևս որևէ շոշափելի քայլ դրանց լուծման ուղղությամբ չեն կարող տեսնել և արձանագրել:

Նա նաև Փաշինյանին փոխանցեց լրագրողների դժգոհությունը, որոնք ԱԺ-ի օթյակում բողոքի ձայն էին բարձարցնում:

Թագուհի Թովմասյանը, փորձելով որպես նախկին լրագրող Փաշինյանի ուշադրությունը հրավիրել, որ նաև նրա՝ լրագրող աշխատելու տարիներին ԱԺ-ում երբեք լրագրողի աշխատանքի այսպիսի տարբերակված մոտեցում և սահմանափակում չի եղել, ցանկացավ լսել նրա կարծիքը:

«Կառավարության ծրագրում լրագրողական էթիկայի կարգավորման առաջարկ ունենք, մենք կարծում ենք, որ պետք է օրենսդրական փոփոխություն առաջարկենք, որով սահմանենք ինստիտուտ, երբ լրագրողներն իրենք իրենց գործունեության որոշակի կանոններ կմշակեն և իրենք կհետևեն այդ կանոնների ներկայացմանը»,- հայտարարեց Փաշինյանը և հավելեց. «Մենք շատ աննախադեպ իրավիճակներ ունենք և նաև այսօր՝ ԱԺ-ում, և կառավարությունը պետք է և ստիպված է աննախադեպ իրավիճակներին անդրադառնալ աննախադեպ քայլերով»:

Ըստ Փաշինյանի՝ ՀՀ քաղաքացիները նաև իրավունք ունեն իմանալ լրատվամիջոցների իրական շահառուների մասին, որպեսզի հստակ բաժանարար գծեր լինեն և հստակ լինի, թե լրագրողը լրագրողական գործունեությամբ է զբաղվում, թե՞ քաղաքական ֆրակցիայի կամ շրջանակի ներկայացուցիչ է:

Իր խոսքի վերջում Նիկոլ Փաշինյանը բնական համարեց, որ նման տարածաշրջանային իրավիճակում Գեղարքունիքում կամ այլ սահմանամերձ հատվածներում բնակիչները ենթարկվում են հարձակման և այն լուծելու համար խաղաղության օրակարգ պետք է հաստատվի: