Ձեր վստահելի աղբյուրը

 «Այն, ինչ ընդամենը մեկ նիստ առաջ տեղի ունեցավ այստեղ, ոչ թե ժողովրդավարութան անշրջելիությունն էր, այլ՝ ժողովրդավարության ֆիասկոն»,- անդրադառնալով պատգամավոր Աննա Մկրտչյանի հետ տեղի ունեցած միջադեպին՝ ասաց «Հայաստան» խմբակցության պատգամավոր Լիլիթ Գալստյանը:

Նրա խոսքով՝ տեղի ունեցածը որևէ առնչություն չունի ժողովրդավարության հետ և այն կատարվեց ԱԺ նախագահի և Փաշինյանի սադրանքով, ինչի հետևանքով իր երկու գործընկեր պատգամավորները ստացել են մարմնական վնասվածքներ, և դրանք առհասարակ պառլամենտարիզմի հետ կապ չունեն:

Գալստյանի խոսքով, Աժ-ում սահմանափակվեց քաղաքական խոսքի ազատությունը, որն ամրագրված է նաև Սահմանադրության մեջ:

«Դուք ոչ միայն երկրորդ անգամ չափսոսացիք կատարվածի համար որպես «ժողովրդավարության ջատագով», այլ դուք այդ հանցագործությունը քաջալերեցիք»,- հայտարարեց պատգամավորը և ճիշտ համարեց ընդդիմության սառնասիրտ պահվածքը, ինչի արդյունքում նոր սադրանքին տեղի չտրվեց:

Պատգամավորը հարցրեց Նիկոլ Փաշինյանին. «Դուք իսկապե՞ս համոզված եք, որ ձեզ հաջողվել է ժողովրդավարություն կառուցել և պատերազմող երկրի՝ իբրև առաջին նվաճում թափահարում եք ժողովրդավարությո՞ւնը»:

Պատգամավորի հարցին ի պատասխան՝ Փաշինյանը ընթերցեց կառավարության 2021-26 թթ. գործունեության ծրագրի մի հատվածը. «Միաժամանակ ժողովրդավարության թյուր ընկալումը, որպես պարարտ հող ամենաթողության և անպատժելիության համար, լրջագույն սպառնալիք է ստեղծում իրավակարգի, հանրային անվտանգության, օրենքի և իրավունքի գերակայության համար»:

Ըստ Փաշինյանի՝ իրենք օրենքի և իրավունքի դիկտատուրա հաստատելու մանդատ են ստացել ժողովրդից և անշեղորեն կյանքի են կոչելու այն:

«Ես ուրախ եմ ու համոզված եմ, որ ՊՊԾ-ն այս դահլիճում և այս դահլիճից դուրս որևէ մեկին անգույշ չի քաշքշի, առավել ևս՝ զուգարաններում, բայց որևէ մեկը կասկած չունենա, որ ՀՀ-ում իրավակարգը, օրինականությունն ամենակոշտ մեթոդներով պահպանվելու են»,- հայտարարեց կառավարության ղեկավարը և նկատեց, որ «ԱԺ կանոնակարգ» օրենքն ընդունվել է նախկին իշխանությունների օրոք և իրենք իրականացնելու են այն:

«Հայաստան» խմբակցության պատգամավոր Լիլիթ Գալստյանը, մատնանշելով իշխանական պատգամավորների կողմը, արձագանքեց. «Ինձ թվում է՝ ժողովրդավարություն ասելով դուք նկատի ունեք ձեր իշխանության ամրապնդումը, լրագրողներից ձեր պանիկ փախուստը, հեռախոսային արդարադատությունը, վնգստացող և ծեփված դատավորներին, քաղաքական պատանդ մեր երեք գործընկերներին և այն նախամարդու մուրճը, որ լավ կանեիք, մի կանգառ էլ այն հատվածում թափահարեիք»: