Ձեր վստահելի աղբյուրը

«Հակառակ պետական իշխանությունների պնդումներին՝ արտահերթ խորհրդարանական ընտրությունների արդյունքում անվտանգային, պետական կառավարման, քաղաքական, սոցիալ-տնտեսական բարոյահոգեբանական ճգնաժամը չի հաղթահարվել»,- ԱԺ-ում հայտնեց «Հայաստան» խմբակցության պատգամավոր Անդրանիկ Թևանյանը:

Նրա խոսքով, եթե համաճարակով պայմանավորված սահմանափակումները չլինեին, ապա Հայաստանից արտագաղթը կվերածվեր տարհանման:

Ըստ պատգամավորի, ճգնաժամի չհաղթահարման մյուս ապացույցն Ադրբեջանի նախագահի ախորժակն է և ՀՀ տարածքում թշնամու զորքերի ներկայությունը, իսկ Ալիևն ագրեսիվացել է, քանի որ Հայաստանը շարունակում է ներկայանալ պարտության դեմքով:

««Արժանապաիվ խաղաղության» բանաձևին պարտության կուսակցության առաջնորդը հակադրեց «Նվաստացման գնով խաղաղություն» հակապետական բանաձևը, որը բերում է և նվաստացում, և պատերազմ»,- ասաց «Հայաստան» խմբակցության պատգամավորը և շեշտեց, որ խաղաղության դարաշրջանի լոզունգների ներքո նոյեմբերի 9-ից հետո արդեն տասնյակ զոհեր ենք տվել:

Թևանյանի խոսքով, Ադրբեջանի ժողովրդին բավարարելու ձգտումը տվել է իր արյունոտ պտուղները և ներկայում կանգնած ենք լինել-չլինելու հարցի առաջ:

Պատերազմի պատճառը, ըստ պատգամավորի, պարտության կուսակցության առաջնորդի մեծագույն սխալն է եղել, որով Հայաստանն ու Արցախը մտցրել է միջազգային խոշոր խաղացողների հակադրության տիրույթ:

Անդրանիկ Թևանյանը հայտարարեց, որ բանակցության գործընթացը տապալելով, սխալ արտաքին և ներքին քաղաքականություն վարելով Փաշինյանը դարձել է պատերազմի և պարտության թիվ մեկ պատճառը, պատասխանատուն, մեղավորը և ավելացրեց, որ այսօր Արցախի խաղաղության երաշխավորը բացառապես Ռուսաստանի խաղաղապահներն են, իսկ Հայաստանի ինքիշխանությունը հայտնվել է հարցականի տակ և Հայաստանը գոյատևում է ոչ թե մեր բանակի, այլ ռուսական գործոնի շնորհիվ:

«Սիրելի ժողովուրդ, քեզ խաբել են, խաբում են ու շարունակելու են խաբել, քանի դեռ հաշիվ չես պահանջում»,- հայտարարեց պատգամավորը և շեշտեց, որ իշխանությունը պառակտել է ժողովրդին, թշնամացրել բարեկամներին, հասարակությանը վերածել ամբոխի և արթնացրել ստորին բնազդները:

«Մեր նեոբոլշևիկները խոստացան խաղաղություն և թռիչքաձև աճ, բայց վերջինս ապահովեցին բացառապես իրենց գրպաններում, իսկ Հայաստանի և Արցախի գլխին բերեցին պատերազմ, ողբերգություն ու պարտություն»,- ասաց Թևանյանը և հավելեց, որ իշխանության քարոզչական մեխն այն է, որ «հպարտ»  որակված քաղաքացու հակառակորդը ոչ թե արտաքին թշնամին է, այլ իր տան հարևանը, բարեկամը, այն համաքաղաքացին, որն իր դասակարգից չէ:

Նրա խոսքով, իշխանություններն Արցախի կորուստը ներկայացնում են իրենցից չկախված ողբերգություն, բայց և՝ դրական հնարավորություն Հայաստանի նոր ապագայի համար, բայց Սյունիքի, Գեղարքունիքի և Արարատի մարզերի տարածքների նկատմամբ Ադրբեջանի նկրտուները փաստում են, որ հայ ժողովուրդը կանգնած է ավելի վտանգավոր մարտահրավերների առաջ:

Ըստ պատգամավորի, ներկայիս իշխանություններն առաջնորդվում են բոլշևիկների ոճով, իսկ նպատակը մեկն է՝ ունենալ իշխանություն և իրականացնել սեփականության վերաբաշխում:

«Հայաստան» խմբակցության պատգամավորը ժողովրդին հարցրեց, թե այս երեք տարվա թալանի դեմ պայքարից ինչ են իրենք ստացել և անմիջապես հաստատեց, որ ոչինչ, իսկ իշխանությունները ստացել են ու արագ հարստացել, հակաօլիգարխիկ պայքարի ներքո վերկենդանացնում են հին օլիգարխներին ու ստեղծում նորերին՝ ասֆալտի օլիգարխներին և թալանի դեմ կոչեր հնչեցնեղներն իրենք են զբաղված թալանով:

«Պատերազմում հազարներով զոհվեցին, իսկ զոհվելու պատրաստակամություն հայտնած առաջնորդը, ոչ թե հեռացավ պաշտոնից, այլ ինքնահռչակվեց որպես փրկիչ ու մտավ խաղաղության աղավնու դերի մեջ, որն էլ ոգևորեց Ալիևին և բացեց նրա ախորժակը»,- հայտնեց Թևանյանը: