Ձեր վստահելի աղբյուրը

8-րդ գումարման Ազգային ժողովի աշխատանքների մեկնարկը նշանավորվեց շենքում անվտանգության աննախադեպ միջոցառումների իրականացմամբ: Այսօր խորհրդարանի մուտքերում գործող անցագրային կետերից բացի շենքի բոլոր հարկերում ԱԱԾ Պետական պահպանության ծառայության աշխատակիցներն են հերթապահում, արգելվում է լրագրողների մուտքը ԱԺ իշխանական պատգամավորների աշխատասենյակների մասնաբաժինը: Աչքի է զարնում այն տեսարանը, որ ՊՊԾ աշխատակիցները դաշտային համազգեստով են, ինչը նախկինում երբևէ չէր եղել:

ՀՀ ուժային կառույցներում հստակ կանոնակարգված և տարանջատված են դաշտային, ամենօրյա և պահակային ծառայության համար նախատեսված համազգեստների ձևերը, կրելու կարգը և պայմանները:

Օրինակ՝ ՀՀ ԶՈւ-ում այն կարգավորվում է ՀՀ զինված ուժերի ներքին ծառայության կանոնագրքով, որն ուղենիշ է հանդիսանում մյուս ուժային կառույցների համար: Վերոնշյալ օրենքով ՀՀ ԶՈւ զինծառայողների համար սահմանվում են համազգեստի անհրաժեշտ տեսակները և կրելու պայմանները, իսկ կառավարությունը հաստատում է դրանց և զինվորական տարբերանշանների միասնական ձևերն ու նկարագրերը: Զինվորական համազգեստ կրում են Հայաստանի Հանրապետության պետական կառավարման լիազորված մարմնի ղեկավարի կողմից հաստատված կանոններին խիստ համապատասխանությամբ:

Panorama.am կայքը փորձեց ԱԱԾ տնօրեն Արմեն Աբազյանից պարզել, թե ո՞ր իրավական նորմով է կանոնակարգվում Պետական պահպանության ծառայության աշխատակիցների համազգեստներ կրելու հարաբերությունները և ինչո՞ւ ԱԺ շենքում ծառայությունը տարվում դաշտային համազգեստով:

ԱԱԾ-ի տնօրենի փոխարեն մենք ստացել ենք ՊՊԾ-ի պետ Սարգիս Հովհաննիսյանի ստորագրությամբ պատասխան գրությունը, որում հիշատակվել է 2018 թվականի սեպտեմբերի 17-ին ընդունված «ՊՊԾ զինծառայողների միասնական համազգեստի և տարբերանշանների նկարագիրը հաստատելու մասին» վարչապետի և 2015 թվականի դեկտեմբերի 3-ին հաստատված «ՀՀ պաշտպանության նախարարության և ազգային անվտանգության ծառայության համակարգերի զինծառայողների, փրկարարական ծառայողների իրային ապահովության կարգը (չափաքանակները) սահմանելու մասին» կառավարության որոշումները: Սակայն վերոնշյալ իրավական ակտերով նկարագրված են միայն ՊՊԾ աշխատակիցների համազգեստի ձևերը, տրամադրման չափաքանակներն ու ժամկետները, բայց դրանցով չի կարգավորվում համազգեստի կրման կոնկրետ վայրը:

«ՊՊԾ զինծառայողների միասնական համազգեստի և տարբերանշանների նկարագիրը հաստատելու մասին» որոշումից տեղեկանում ենք, որ ՊՊԾ աշխատակիցներն ունեն ամենօրյա համազգեստներ՝ բաճկոնով և առանց դրա և դաշտային համազգեստներ (տես կից նկարները): ՊՊԾ աշխատակիցները մշտապես ամենօրյա համազգեստ են կրել պետական կարևոր օբյեկտների և ՀՀ-ում դիվանագիտական ներկայացուցչությունների պահպանությունն իրականացնելիս, իսկ դաշտային հագուստները կրում էին համապատասխան բաց տարածքներում և արտակարգ իրավիճակներում:

Այսօր ԱԺ-ում ՊՊԾ աշխատակիցները համատարած դաշտային համազգեստով են: Panorama.am-ը ԱԱԾ պետ Արմեն Աբազյանից նաև հետաքրքրվել էր, թե արդյո՞ք պետական կարևոր նշանակության կառույցում, նրա անցակետերում ՊՊԾ-ն պետք է դաշտային համազգեստով տանի ծառայությունը:

ՊՊԾ-ի պետ Սարգիս Հովհաննիսյանի ստորագրությամբ պատասխանում, ըստ էության, այդ հարցին տրվել է հետևյալ պարզաբանումը. «Վարչապետի 2018 թվականի  հոկտեմբերի 18-ի «Պետական պահպանության ծառայության կանոնադրությունը և կառուցվածքը հաստատելու մասին» որոշման 20-րդ կետում սահմանված են ՊՊԾ պետի լիազորությունները, մասնավորապես՝ ամրագրված է, որ ծառայության պետը կազմակերպում և ղեկավարում է ծառայության գործունեությունը, իր իրավասության սահմաններում արձակում է հրամաններ և տալիս ցուցումներ, որոնց կատարումը պարտադիր է ծառայության համար, կազմակերպում է դրանց կատարման ստուգումը»:

Պատասխանից կարելի է եզրակացնել, որ ԱԺ-ում ՊՊԾ ծառայողների՝ դաշտային հագուստով ծառայություն տանելու որոշումը Սարգիս Հովհաննիսյանն է կայացրել: Օգոստոսի 24-ին և ԱԺ 8-րդ գումարման առաջին նիստի ժամանակ ՊՊԾ ծառայողների գործողությունները հուշում են, որ ծառայության ղեկավարը պատահական չի ընտրել համազգեստի դաշտային տարբերակը:

Մասնավորապես՝ «Պատիվ ունեմ» խմբակցության պատգամավոր Աննա Մկրտչյանի և «Հայաստան» խմբակցության քարտուղար Արծվիկ Մինասյանի նկատմամբ կիրառված անհամարժեք միջոցները դրա վառ ապացույցն են: ՊՊԾ աշխատակիցները, իրենց պետի  հրամանատարությամբ ժողովրդի ընտրյալ պատգամավորներին «ԱԺ կանոնակարգ» օրենքի պահանջները պարտադրում էին դաշտային պայմանների համար նախատեսված գործողություններով և համազգեստով:

Ա. Վարդանյան