Ձեր վստահելի աղբյուրը

«Նիկոլ Փաշինյանի հրահանգով ձևավորվել են խմբեր, որոնք ամեն րոպե պատրաստ են ուղղակի փողոցային կռվի»,- մեկնաբանելով ԱԺ-ում ընդդիմադիր պատգամավորների վրա իշխանական պատգամավորների հարձակումները՝ հայտարարեց «Հայաստան» խմբակցության անդամ Գեղամ Մանուկյանը:

Նրա կարծիքով, իշխանության նման պահվածքը պայմանավորված է ելույթ ունեցողների նկատմամբ վրեժ լուծելու ցանկությամբ և սուր քննադատություն չեն ուզում դահլիճում հնչի:

Գեղամ Մանուկյանը իր կարծիքը հիմնավորեց նրանով, որ իրենք նկատել են, թե ինչպես Փաշինյանի կողմից կոնկրետ պատգամավորների դերաբաշխում է տեղի ունեցել, որոնք էլ հարձակվել են ընդդիմադիրների վրա:

Պատգամավորը նշեց, որ ընդդիմադիր պատգամավորներն այնպիս կենսագրություն ունեն, որ նման ձևով նրանց հնարավոր չէ լռեցնել:

Մանուկյանը սովորական երևույթ գնահատեց իր վրա հարձակումը, բայց անընդունելի համարեց, որ ամբիոնից թալանի մասին է խոսում մեկը, որի և իր հարազատների ամբողջ կյանքն անցել է թալանի միջով:

«Հայաստան» խմբակցության ներկայացուցիչը վիրավորական համարեց ՀՀ Զինված ուժերի նկատմամբ իշխանական պատգամավորների սիստեմատիկ հարձակումները, երբ երեք տարիների ընթացքում անընդհատ կրկնելով «կոռուպցիա» բառը՝ հեղինակազրկեցին բանակը և հասցրեցին այս օրվան: