Ձեր վստահելի աղբյուրը

Հայաստանի հանքարդյունաբերության ոլորտի խոշորագույն ընկերություններից «Զանգեզուրի պղնձամոլիբդենային կոմբինատ» ՓԲԸ սեփականատերերը՝ «ԱՄՓ ՀՈԼԴԻՆԳ» ՍՊԸ և «ԶԱՆԳԵԶՈՒՐ ՄԱՅՆԻՆԳ» ՍՊԸ վեճը՝ կոմբինատի բաժնետոմսերը տնօրինելու հետ կապված քննվելու են Հայաստանյան դատարաններում:

«Զանգեզուր Մայնինգ» ՍՊ Ընկերության շահերը ներկայացնում է Կոնցեռն Դիալոգ փաստաբանական ընկերությունից հայտնում են, որ 22.07.2021 թվականին «ԶԱՆԳԵԶՈՒՐ ՄԱՅՆԻՆԳ» ՍՊԸ հայցի հիման վրա Հայաստանի Հանրապետության Սյունիքի մարզի ընդհանուր իրավասության առաջին ատյանի դատարանում հարուցվել է թիվ ՍԴ/0695/02/21 քաղաքացիական գործի վարույթը: «ԶԱՆԳԵԶՈՒՐ ՄԱՅՆԻՆԳ» ՍՊԸ պահանջում է ձեռքբերման նախապատվության իրավունքով «ԶԱՆԳԵԶՈՒՐԻ ՊՂՆՁԱՄՈԼԻԲԴԵՆԱՅԻՆ ԿՈՄԲԻՆԱՏ» ՓԲԸ վերցնել և հատուցման դիմաց իրեն ի սեփականություն փոխանցել «ԶԱՆԳԵԶՈՒՐԻ ՊՂՆՁԱՄՈԼԻԲԴԵՆԱՅԻՆ ԿՈՄԲԻՆԱՏ» ՓԲԸ սեփական 2,061,253 հատ հասարական բաժնե­տոմսերը, ընդհանուր՝ 41,225,060,000 ՀՀ դրամ անվանական արժեքով:

02.08.2021 թվականին «ԶԱՆԳԵԶՈՒՐ ՄԱՅՆԻՆԳ» ՍՊԸ հայցի հիման վրա Հայաստանի Հանրապետության Երևան քաղաքի ընդհանուր իրավասության առաջին ատյանի դատարանում հարուցվել է մեկ այլ թիվ ԵԴ/33826/02/21 քաղաքացիական գործը: Այս հայցով «ԶԱՆԳԵԶՈՒՐ ՄԱՅՆԻՆԳ» ՍՊԸ պահանջում է կանխել պատասխանողներ՝ «ԱՄՓ ՀՈԼԴԻՆԳ» ՍՊԸ (ԶԱՆԳԵԶՈՒՐԻ ՊՂՆՁԱՄՈԼԻԲԴԵՆԱՅԻՆ ԿՈՄԲԻՆԱՏ» ՓԲԸ բաժնետեր), «ՍԹԱՐ ԴԱՍԹ» ՓԲԸ («ԱՄՓ ՀՈԼԴԻՆԳ» ՍՊԸ 100 տոկոս մասնակից), Մհեր Գարրիսի Պոլոսկովի, Կարեն Ալբերտի Հակոբյանի և Գուրգեն Նարեկի Ամբարյանի («ՍԹԱՐ ԴԱՍԹ» ՓԲԸ բաժնետերեր) կողմից հայցվորի՝ «ԶԱՆԳԵԶՈՒՐ ՄԱՅՆԻՆԳ» ՍՊ ընկերության իրավունքների խախտումը՝ պարտավորեցնելով «ՍԹԱՐ ԴԱՍԹ» ՓԲԸ-ին, նախապատվության իրավունքով հայցվորին՝ «ԶԱՆԳԵԶՈՒՐ ՄԱՅՆԻՆԳ» ՍՊԸ օտարել «ԱՄՓ ՀՈԼԴԻՆԳ» ՍՊԸ կանոնադրական կապիտալում 100 տոկոս մասնակցությունը, ինչպես նաև պարտավորեցնելով Մհեր Գարրիսի Պոլոսկովին (6 բաժնետոմս), Կարեն Ալբերտի Հակոբյանին (2 բաժնետոմս) և Գուրգեն Նարեկի Ամբարյանին (2 բաժնետոմս) հայցվորին՝ «ԶԱՆԳԵԶՈՒՐ ՄԱՅՆԻՆԳ» ՍՊԸ օտարել «ՍԹԱՐ ԴԱՍԹ» ՓԲԸ-ում վերջիններիս սեփականության իրավունքով պատկանող բաժնետոմսերը:

Միևնույն ժամանակ, «ԶԱՆԳԵԶՈՒՐ ՄԱՅՆԻՆԳ» ՍՊԸ-ն միջնորդել է դատարանին կիրառել հայցի ապահովում, ինչը բավարարվել է. Սյունիքի մարզի և Երևան քաղաքի ընդհանուր իրավասության դատարանները որոշել են մինչև գործերի քննության ավարտը արգելել տնօրինել և արգելանքի տակ դնել «ԶԱՆԳԵԶՈՒՐԻ ՊՂՆՁԱՄՈԼԻԲԴԵՆԱՅԻՆ ԿՈՄԲԻՆԱՏ» ՓԲԸ կողմից ձեռքբերված սեփական բաժնետոմսերը («ԶԱՆԳԵԶՈՒՐԻ ՊՂՆՁԱՄՈ­ԼԻԲԴԵՆԱՅԻՆ ԿՈՄԲԻՆԱՏ» ՓԲԸ 2,061,253 հատ հասարական բաժնե­տոմս, ընդհանուր՝ 41,225,060,000 ՀՀ դրամ անվանական արժեքով), ինչպես նաև արգելել տնօրինել և արգելանքի տակ դնել «ԱՄՓ ՀՈԼԴԻՆգ» ՍՊԸ-ի կանոնադրական կապիտալում «ՍԹԱՐ ԴԱՍԹ» ՓԲԸ 100 տոկոս բաժնեմասը և «ՍԹԱՐ ԴԱՍԹ» ՓԲԸ֊ում Մհեր Պոլոսկովի, Կարեն Հակոբյանի և Գուրգեն Ամբարյանի բաժնետոմսերը:

Բաժնետերերի միջև վեճը ծագել է, երբ «ԶԱՆԳԵԶՈՒՐԻ ՊՂՆՁԱՄՈԼԻԲԴԵՆԱՅԻՆ ԿՈՄԲԻՆԱՏ» ՓԲԸ, որի կառավարումը փաստացի իրականացվում է «ԱՄՓ ՀՈԼԴԻՆԳ» ՍՊԸ֊ն և նրա հետ փոխկապակցված անձանց կողմից, չի մարել իր սեփական 2,061,253 հատ հասարական բաժնետոմսերը (ընկերության կանոնադրական կապիտալի 75․000091 տոկոսը), որոնք կոմբինատը գնել էր նախկին բաժնետերեր՝ «ՔՐՈՆԻՄԵՏ մայնինգ» ԲԸ-ից և «Մաքուր երկաթի գործարան» ԲԲԸ-ից: Կոմբինատը նաև նույն բաժնետոմսերը չի վաճառել ընկերության բաժնետեր «ԶԱՆԳԵԶՈՒՐ ՄԱՅՆԻՆԳ» ՍՊԸ-ին: Միաժամանակ, առկա են տեղեկություններ (հիմնավոր կասկած), որ չմարված և բաժնետիրոջը չիրացված բաժնետոմսերը կոմբինատը մտադիր է իրացնել այլ անձանց՝ խախտելով մյուս բաժնետիրոջ՝ «ԶԱՆԳԵԶՈՒՐ ՄԱՅՆԻՆԳ» ՍՊ Ընկերության՝ օրենքով սահմանված գնման նախապատվության իրավունքը, ինչը նաև վկայակոչվել է ներկայացված հայցերի փաստական հիմքերում:

Դատական գործընթացներին զուգահեռ «ԶԱՆԳԵԶՈՒՐ ՄԱՅՆԻՆԳ» ՍՊԸ օրենքի շրջանակներում ձեռնարկում է միջոցներ պարզելու արդյո՞ք ընկերության ու ընկերության ղեկավարության գործունեությունը համապատասխանել է օրենքի պահանջներին, ներառյալ պահանջելով իրականացնել տնտեսական գործունեության համալիր ստուգում բաժնետիրոջ հաշվին, ինչպես նաև պահանջելով անհրաժեշտ տեղեկատվություն ընկերությունից՝ սեփական ստուգումներ կազմակերպելու նպատակով:

Այս պահին կոմբինատը չի համագործակցում բաժնետիրոջ հետ, այդ թվում՝ դեռևս չի ապահովել բաժնետիրոջ պահանջով աուդիտի իրականացումը և պահանջված տեղեկատվության տրամադրումն օրենքով սահմանված ժամկետում: Նշված հարցերի վերաբերյալ համագործակցության բացակայության դեպքում և իրավունքների խախտումը սեղմ ժամկետում չվերացնելու դեպքում (տեղեկատվության չտրամադրման) «Զանգեզուր Մայնինգ» ՍՊԸ-ն պլանավորում է հարուցել նոր իրավական գործընթացներ:

Գործընթացի հետագա զարգացումների մասին «Զանգեզուր Մայնինգ» ՍՊԸ մտադիր է տեղեկացնել իր (կամ իր ներկայացուցչի) հետագա մամլո հաղորդագրություններով:

«ԶԱՆԳԵԶՈՒՐԻ ՊՂՆՁԱՄՈԼԻԲԴԵՆԱՅԻՆ ԿՈՄԲԻՆԱՏ» ՓԲԸ Հայաստանի Հանրապետությունում գրանցված հանքաարդյունահանող ընկերություն է (ՀՎՀՀ՝ 09400818), որը տեղակայված է Քաջարան քաղաքում: Կոմբինատը շահագործում է մոլիբդենի և պղնձի զգալի հաստատված ու կանխատեսվող պաշարներով հանքավայր: