Ձեր վստահելի աղբյուրը

ՀՀ ԱԺ տեղեկատվության և հասարակայնության հետ կապերի վարչությունը հաղորդագրություն է տարածել, որում նշված է, որ լրագրողներին ԱԺ օթյակից հեռացնելու հարցը վերանայման ենթակա է։

«Ազգային ժողովի նախագահ Ալեն Սիմոնյանն օգոստոսի 25-ին լրագրողների հետ ունեցած ճեպազրույցի ընթացքում խստորեն դատապարտեց ԱԺ նիստերի դահլիճում տեղի ունեցածը` շեշտելով, որ բռնությունն անընդունելի է և որևէ արդարացում չունի:

ԱԺ նախագահի խոսքով` նիստերի դահլիճում նմանատիպ միջադեպերի կրկնության դեպքում լրագրողներին նախատեսված օթյակից հեռացնելու վերաբերյալ հարցը քննարկման ընթացքում է,և ամենայն հավանականությամբ այն վերանայման ենթակա է:

Միևնույն ժամանակ նա ուշադրություն հրավիրեց այն փաստին, որ միջազգային պրակտիկայում սովորաբար նման դեպքերում կադրը փոխում են` հարգելով անձանց արժանապատվությունն ու բարի համբավը:

Եզրափակելով խոսքը` Ալեն Սիմոնյանը նշեց, որ ամենակարևորը դեպքերի կրկնությունից խուսափելն է»,- նշված է հաղորդագրությունում:

Նշենք, որ Խորհրդարանի աշխատանքները լուսաբանող լրագրողներն օրերս բողոքի ակցիա իրականացրեցին։ Նրանք բողոքում են իրենց մասնագիտական աշխատանքը սահմանափակելու դեմ։

ԱԺ խորհուրդն ընդունել է որոշում, ըստ որի  լրագրողներն իրենց մասնագիտական գործունեությունը կիրականացնեն Ազգային ժողովի նստավայրում առանձնացված հատուկ տեղերում։