Ձեր վստահելի աղբյուրը

Ազգային ժողովում «Պատիվ ունեմ» դաշինքի ղեկավար, «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանն իր ելութը սկսեց երկու սկզբունքային հարցով:

«Կառավարության ներկայացված ծրագրում լավ գաղափարաներ, ճիշտ մոտեցումներ կա՞ն: Պատասխանը շատ պարզ է՝ իհարկե կան:

Քննարկումը, թե կարող է  լինել ավելի լավ ծրագիր, մի տեսակ արհեստական է: Կարող է լինել  մի քիչ ավելի լավը, վատը, կարող է լինել այս կամ այն տարբերություններով, բայց դա էական բան չէր փոխի, որովհետև անմիջապես գալիս է երկրորդ հարցը:

Կա՞ երաշխիք, որ այս ծրագիրը կատարվելու է, դառնալու է իրականություն: Իմ կարծիքով, ոչ, չկա»,- իր հարցադրումններն ու կարծիքը ներկայացրեց Ա. Վանեցյանը:

Հիշեցնենք, որ օգոստոսի 24-ից Աժ-ում քննարկվումէ  կառավարության ծրագիրը: Հիմնական զեկուցողն է Նիկոլ Փաշինյանը:

«Պատիվ ունեմ» խմբակցության ղեկավարի խոսքով, նման եզրահանգման հիմք է տալիս երկրում այսօր առկա մթնոլորտն ու հասարակական  տրամադրությունները, նման եզրահանգման հիմք է  տալիս գործող իշխանությունը, որ ինչքան ուժ ունի չի հասկանում:

«Իշխանական լծակներին այսօր տիրապետողները նման են զրոյական փորձառություն ունեցող այն երեխաներին, որոնց ինչքան էլ ասում ես՝ չի կարելի հոսանքի հետ խաղալ, միևնույն է, ասածդ հասկանում են միայն այն ժամանակ, երբ երկաթե ձողով մտնում են վարդակի մեջ։
Նրանք չեն հասկանում, որ հոսանքը վտանգ է, ու չեն լսում «մի՛ արա» հորդորը, հետո մի լավ հարված են ստանում ու սկսում սարսափել հոսանքից։

Նույնը մեր մոտ է։ Ասում ես չի՛ կարելի չբանակցել, չի՛ կարելի բանակցային գործընթացին այդպես անլուրջ ու մեծամիտ վերաբերել, չեն լսում, հետո լինում է դեպքերի կանխատեսելի ընթացք, ու նրանք ամբողջ կյանքում դառնում են պատերազմից սարսափողներ։

Ասում ես չի՛ կարելի խաղալ գերտերությունների հակասությունների վրա, չի՛ կարելի շանտաժի լեզվով կամ գռեհիկ կերպով վերաբերել գործընկեր երկրներին, չեն լսում, հետո լինում է դեպքերի կանխատեսելի ընթացք, ու նրանք դառնում են ինքնուրույն որևէ բան որոշելուց սարսափողներ։
Վախ չունեն միայն նրանք, ովքեր չեն հասկանում, բայց անվախ են միայն մինչև առաջին հարվածը»,- ասաց  Ա. Վանեցյանը:

Նրա խոսքով, այն, ինչ այս օրերին կատարվում է  Հայաստանում՝ լրագրողների, պատգամավորների, համայնքապետերի, մյուսների հադեպ, վախ չունենալու արդյունք է. «Կրկնում եմ՝ վախ չունեն, քանի որ չեն հասկանում, դեռ երբեք միջազգային ծանր բանաձևերի,  վերպետական դատական ատյանների, այլ գործիքների հարվածներ չեն զգացել»:

ԱԱԾ նախկին ղեկավարն  ասաց՝ երբեք չէր մտածի, որ կրկին կասի՝ կանգ առեք. «Ասում եմ, որովհետև տեսնում եմ, թե ինչպես է իշխանությունը գնում և երկիրը տանում դեպի  մի նոր ու վտանգավոր ծուղակ: Այդ ծուղակի էությունը  հանրային տրամադրությունների սխալ ընկալումն է և անվերապահ հաղթածի խաբկանք  հոգեբանությունը:

Իմ պարտքն է զգուշացնել, որ  հանրային տրամադրությունները  շատ ավելի խորն են, շատ ավելի ռիսկային, քան ընտրությունների  թվային արդյունքները: Գուցե ձեզ վստահություն է տալիս անընդհատ ասել՝ ժողովուրդը մեզ արդեն գնահատական է տվել, մեզ է ընտրել, մեզ ներել է, մեզ  սիրել է և այլն: Զգուշացնում եմ՝ դա մեծ ծուղակ է»:

Ա. Վանեցյանն ասաց, որ կա ծանր ճնշող մի համոզմունք՝ ինչ-որ  մի շատ կարևոր բան այնպես չի գնում:

«Իսկ սխալի էությունը հետևյալն է՝ մենք չենք ուզում, չենք կարողանում, խուսափում ենք հասկանալի տեղի ունեցած աղետի ողջ խորությունը, չհասկանալ ու չընդունել կատարվածիմասշտաբները, նշանակում է՝ մեծացնել հաջորդ աղետի հավանականությունը: Մենք շատ հեշտ ենք ասում 44-օրյա պատերազմ, կարծես թե 45-րդ օրվանից կյանքը վերականգնվել է:
Մենք շատ հեշտ ենք ասում հազարավոր զոհեր, հարյուրավոր գերիներ, անհետ կորածներ: Շատ հեշտ ենք ասում Արցախի Հանրապետություն 75 տոկոսի կորուստ, շատ հեշտ ենք ասում անվտանգային նոր մարտահրավերներ և այլն»,- նշեց նա:

Ա. Վանեցյանի դիտարկմամբ, ամենամեծ վտանգը նրանում է, որ նոյեմբերի 10-ից հետո Հայաստանում չի եղել խորքային քննարկում և խորքային ըմբռնում տեղի ունեցածի  ծավալների, պատմական նշանակության վերաբերյալ:

«Մեր երկրի, ժողովրդի կյանքում տեղի են ունեցել պատմական աղետալի փոփոխություններ, ծառացել են նոր, սուր մարտահրավերներ: Շատ բան է փոխվել ու դրանց դիմակայելու համար, կարծում եմ, անհրաժեշտ է հասկանալ կատարվածի մասշտաբները, սառը հաշվարկել  առաջիկա ռիսկերը, գրագետ քայլերով գնալ դեպի ջարդված պետականության վերականգնում:

Մնացածը, կներեք, ժամավաճառություն է, ինչն էլ հենց կազմում է  այս ծրագրի մեծ մասը: Այսօր Հայաստանն ունի մեկ հիմնական խնդիր՝ ապահովել մեր և Արցախի անվտանգությունը, մեր պետության ու  ժողովրդի բոլոր ռեսուրսները պետք է դրվեն այս խնդրի լուծմանը: Դա պետք է արվի բոլոր միջոցներով՝ դաշնակիների, հակառակորդի հետ բանակցությունների միջոցով, Զինուժի,  համագործակցության, նոր գաղափարների միջոցով: Բայց թիվ մեկ խնդիրը սա է ու մենք սա պետք է լուծենք:

Մենք չպետք է վախենանք միջազգային հանրության հետ նոր գաղափարներով խոսելուց, դաշնակիցների հետ նոր  գաղափարներ քննարկելուց, մենք չպետք է վախենանք ոչ բարյացկամ հարևանների հետ դժվար խոսակցությունից ու նաև ոչ ասելուց:

Ընդհանրապես, մենք չպետք է վախենանքն, բայց ոչ թե չվախենանք չհասկանալու պատճառով»,- ասաց Ա. Վանեցյանը:

Նա նշեց, որ երեք հարց էր ձևակերպել՝ ակնկալելով հիմնական զեկուցողի պատասխանները լսել, սակայն ժամանակի սղության պատճառով հարցերը կփոխանցի գրավոր:

Ելույթի եզրափակիչ մասում՝ «Պատիվ ունեմ» խմբակցության ղեկավարն ասաց. «Վստահ եմ ու համոզված, որ առաջիկա տարիների համար չափազանց կարևոր  խնդիր է հայկական աշխարհի միասնականության վերականգնումը: Նոյեմբերի 9-ին ձեր ստորագրած  ամոթալի փաստաթուղթը  մեծ փլուզումներ է առաջացրել հայկական աշխարհում: Արցախը միշտ եղել է  մեր միասնականության և ազգային ինքնագիտակցության առանցքներից մեկը:

Հասկանում եմ՝ շատ դժվար է համախմբվել պարտության և կորստի շուրջ: Այսօր Արցախն իրեն լքված է  զգում, Սփյուռքը՝  օտարված, Հայաստանը՝ մոլորված: Չկան այն առանցքները, գաղափարական ու ազգային  նպատակները, որոնք դարձյալ մեզ  կդարձնեն եռամիասնություն, կդարձնեն ուժեղ, միասնական ազգ, կվերականգնեն մեր ազգային  արժանապատվությունը: Այստեղ պետք է գրագետ, դժվար ու համառ աշխատանք ու այդ դեպքում մենք անպայման կունենանք հաջողություն:

Ինչու եմ սա այսքան կարևորում, որովհետև հենց որ մենք կարողանանք վերականգնել մեր եռամասնությունը, ազգային միասնականությունը և արժանապատվությունը, շատ ավելի հեշտ կկարողանանք բանակցել մեր դաշնակիցների հետ ու  շատ ավելի հեշտ կկարողանանք  խաղաղություն հաստատել մեր անմիջական հարևանների հետ: Իսկ  դա պետք է սկսել հասարակական  համերաշխություն ապահովելով: Մի բան, որ գործող  իշխանությունը վերջին երկու օրերին հաջողությամբ տապալեցին այս դահլիճում»:

Արթուր Վանեցյանը երկու խորհուրդ տվեց.

«Կանանց վրա պետք չէ զորք ուղարկել, ընդհանրապես պետք չէ պառլամենտում  զորքով հարցեր լուծել: Դա մի  օր կհանգեցնի՝ «պահակախումբը հոգնել է, քնել է ուզում» հայտնի պատմական ձևակերպմանը: Կամ եթե ուզում եք, ձեր գործն է, շարունակեք նույն  ոգով: Չէ որ դուք անվախ եք, երևի որովհետև չեք հասկանում»: