Ձեր վստահելի աղբյուրը

«Խոսքը 21 կիլոմետրանոց հատվածի մասին է, որը ԽՍՀՄ քարտեզներով Խորհրդային Հայաստանի տարածքից դուրս է եղել, այդ տեղերում ադրբեջանցիները եկել, փակել են՝ որպես պատճառ բերելով, թե նախորդ գիշեր միջադեպ է տեղի ունեցել, հայկական կողմից մարդիկ են մտել և դանակահարել են ադրբեջանցի սահմանապահների»,- ԱԺ-ում հայտարարեց Նիկոլ Փաշինյանը՝ խոսելով  Կապան-Գորիս միջպետական ճանապարհի Կարմրաքար-Շուռնուխ հատվածն  ադրբեջանցիների կողմից փակելու մասին։

Նա նշեց, որ պաշտոնապես ասում են՝ դանակահարության վերաբերյալ այդ տեղեկությունն իրականությանը չի համապատասխանում և կոչ են անում՝ եթե ադրբեջանական կողմն այդպիսի հիմնավորումներ ունի, որ նման բան եղել է, թող փոխանցի իրենց, որպեսզի իրենք էլ հետաքննենք, հասկանան, թե ինչ է։

«Բայց այն, ինչ տեղի է ունեցել, հակասում է, ինչպես գրված է պաշտպանության նախարարության 2020 թվականի դեկտեմբերի 19-ի հայտարարության մեջ, պայմանավորվածությանը, որը ձեռք է բերվել Հայաստանի և Ռուսաստանի միջև և ամրագրվել է այդ պայմանավորվածությունը։ Էլի եմ ասում՝ եռակողմ հայտարարություն, ինչի պատրաստման մասին ես ասել եմ, չի ստորագրվել։ Սա է ամբողջ խնդիրը», - ասաց Փաշինյանը։

Նա նշեց, որ Սյունիքի մարզը Հայաստանից կտրված չէ. «Այնտեղ կա այլ ճանապարհ, մասնավորապես Կապան-Աղվանի ճանապարհը, որը մեծ տեմպերով ասֆալտապատվում է։ Նորմալ, գրունտային ճանապարհ կա։ Ես նկատի ունեմ՝ Սյունիքի մարզը, իհարկե, Հայաստանից կտրված չէ: Կանխատեսել ենք, որ այսպիսի իրավիճակներ կարող են լինել, այնպես ենք պայմանավորվել, որ տրանսպորտային երթևեկությունը կարգավորենք և երաշխավորենք, այդ աշխատանքները կշարունակվեն:

Ռազմավարական  առումով, իհարկե,  Հյուիսի-հարավ ճանապարհի կառուցումն է լուծելու այդ հարցը, բայց ոչ ամբողջապես, նաև Շուռնուխ և Որոտան համայնքների ճանապարհների լավարկման հետ կապված աշխատանք է սկսված, որը  մենք հիմա պարզապես կարգացնենք»: