Ձեր վստահելի աղբյուրը

«Ադրբեջանը, Սյունիքում փակելով միջպետական ճանարահի կոնկրետ հատվածը,  շրջափակել է մարզի 9 գյուղ, կտրել է Հայաստանի հետ շփվելու որևէ հնարավորություն»,- ասուլիսում ասաց ռազմական փորձագետ Հայկ Նահապետյանը:

Նրա խոսքով, 21 կմ-ի հարակից տարածների այդ 9 գյուղն այս պահի դրությամբ Ադրբեջանի ռազմաքաղաքական ղեկավարության որոշմամբ շրջափակված է, միջազգային իրավունքի բոլոր նորմերով այդտեղ ապրող Հայաստանի քաղաքացիներից խլված է ապրելու, աշխատելու, բուժօգնություն ստանալու իրավունքը:

Ըստ փորձագետի, այն փաստը, որ դա այլևս Ադրբեջանի վերահսկողության ներքո պետք է լինի, երեկ հայտարարել է Նիկոլ Փաշինյանը՝ ասելով, որ կա այլ Կապան-Աղվանի նորմալ գրունտային ճանապարհ և Սյունիքի մարզը Հայաստանից կտրված չէ:

«Բայց 9 գյուղ կտրված է։ 9 գյուղ հանձնված է, եթե հանձնված չլինեին, այդ անձը կասեր՝ այո, փակվել է ճանապարհը, Հայաստանի կառավարությունն ամեն ինչ անելու է ժամ առաջ բացի այդ ճանապարհահատվածը, որպեսզի 9 գյուղերի բնակիչները կարողանան կապ ունենալ մարզի և Հայաստանի մյուս բնակավայրերի հետ։ Իսկ երբ ասում է՝ կա այլ ճանապարհ, նշանակում է, որ ինքը 9 գյուղն արդեն հանձնել է: Ընդունում ենք սա ի գիտություն՝  9 գյուղ հանձնված է»,-ասաց Հայկ Նահապետյանը։

Քաղաքագետը նշեց, որ  միջպետական ճանապարհի փակումով փաստացի կտրվեց Հայաստան-Իրան ճանապարհն ավտոբեռնափոխադրումների համար, քանի որ Գորիս-Տաթև-Կապան այդ ճանապարհը բավարար չէ ոչ չափսերի, ոչ ճանապարհի որակի առումով, ոլորանները վտանգավոր են:

«Հետևաբար Իրանից Հայաստան, Հայաստանից Վրաստան, Փոթի նավահանագիստ, Սև ծով բեռնափոխադրումը սկզբունքորեն փակ է»,- ասաց նա:

Նրա գնահատմամբ, այն, ինչ կատարվում է այսօր Ադրբեջանի ռազմաքաղաքական ղեկավարության կողմից, հստակ է, տեսանելի է, ուղղակիորեն մեր երկրի անվտնագությանը սպառնալիք է. «Սա պատերազմի էլեմենտ է, որը կիրառվում է մեր նկատմամբ»: 

Հ.Նահապետյանի խոսքով, Ադրբեջանի կողմից իրականացվող քաղաքականություն Հայաստանի նկատմամբ 3 գոտիավորում ունի. առաջին՝ սահմանամերձ բնակավայրերում ստեղծել իրավիճակ, որպեսզի բնակիչները դուրս գան, երկրորդ՝ կենտրոնական մասերում, բնակավայրերում գնում են հսկայական հողատարածքներ, տներ, երրորդ՝ վրացական սցենարով Հայաստանի աջարացումն է: