Ձեր վստահելի աղբյուրը

Արտեմ Ալիխանյանի անվան Ֆիզիկայի ինստիտուտի կողքին՝ Երևանի Աջափնյակ վարչական շրջանի «Ֆիզգոռոդոկ»-ում շինարարական աշխատանքները վերսկսվել են։ Հարակից շենքերի բնակիչները ի նշան բողոքի ակցիա են անում: «Ֆիզգոռոդոկ»-ի երկու բնակիչ հացադուլ են հայտարարել:

«Մեզ Երևանի քաղաքապետարանի կողմից պետք է տրվի բոլոր պակաս տեղեկատվությունը: Չեմ դադարեցնելու հացադուլը մինչև չտրամադրվի այդ տեղեկատվությունը և այս շինարարությունը պետք է կասեցվի մինչև իրավական գործընթացների ավարտը»,- լրագրողներին ասաց հացադուլ հայտարարած բնակիչներից Հայկ Հարությունյանը։

Թաղամասի բնակիչ, ինժեներ Կարեն Ամիրխանյանն այսօրվանից միացել է հացադուլին:

«Այսօրվանից սնունդ չեմ ընդունում, միայն ջուր, մինչև փորձենք վերջիվերջո ինչ-որ օրինական դաշտ վերադարձնենք շինարարներին»,- ասաց նա:

Երևանի քաղաքապետին կից քաղաքաշինական խորհրդը 2020 թվականի հունիսի 12-ին հավանության է արժանացրել Ալիխանյան եղբայրներ փողոցի 6/1 հասցեում բազմաբնակարան բնակելի շենքի ճարտարապետահատակագծային առաջադրանքը: Կառուցապատվող տարածքը գտնվում է Երևանի՝ Արտեմ Ալիխանյանի անվան Ֆիզիկայի ինստիտուտի կողքին՝ Աջափնյակ վարչական շրջանի «Ֆիզգոռոդոկ» թաղամասում: Այն Երևանի ամենականաչ ու պատմություն ունեցող վայրերից է։ Կառուցվել է 1950-ական թվականներին՝ Ֆիզիկայի ինստիտուտի աշխատակիցների համար։

urbanista.am-ը գրում է, որ Հանրային քննարկման դրվելուց հետո նոր նախագիծը հաստատվել է` չնայած թաղամասի բնակիչների մի մասի մտահոգությանը: Ներդրող կազմակերպության տնօրեն Արթուր Մնացականյանը նշում է, որ նախատեսվում է կառուցել 12 հարկանի բարձրահարկ շենք 90 բնակարանով, 50 ստորգետնյա և 30 բացօթյա ավտոկայանատեղիով (եռահարկ)։ Բնակիչները դեմ են 12 հարկանի շենքի կառուցմանը: