Ձեր վստահելի աղբյուրը

ՀՀ ԱԺ Մարդու իրավունքների պաշտպանության և Հանրային հարցերի մշտական հանձնաժողովում քննարկում է ԱԺ-ում հավատարմագրված լրագրողների ազատ տեղաշարժի սահմանափակման և կարգի վերաբերյալ։

Հանձնաժողով նախագահ Թագուհի Թովմասյանը նշեց, որ այս հավաքի նպատակն է լրագրողական հանրույթի լսելի լինելու հրամայականը, որը խախտվել է ԱԺ ղեկավարության կողմից և լրագրողներին առնչվող փոփոխություններ են կատարվել, որոնք որ չեն ճշտվել լրագրողական հանրույթի ներկայացուցիչների կողմից, իրականացվել են լրագրողների աշխատանքի սահմանափակումներ խորհրդարանի շենքում և լրագրողներից որևէ մեկը հնարավորություն չի ունեցել առաջարկ-դիտողություն ներկայացնել որոշման կապակցությամբ։

«Իրազեկ քաղաքացիների միավորում» ՀԿ ղեկավար Դանիել Իոաննիսյանն ասաց՝ իրավական ակտը, որով սահմանափակվում է լրագրողների գործունեությունը ԱԺ շենքում, որոշակիորեն հակասում են Սահմանադրության 51 և 42-րդ հոդվածներին, որոնք սահմանում են տեղեկատվություն փնտրելու ու ստանալու ազատությունը և մամուլի ազատությունը։

«Արձանագրենք, որ սահմանափակումը տրված չէ օրենքով և, հետևապես, այն իրավաչափ չէ։ Ամենաուշը վաղը մենք արդեն մուտքագրելու ենք հայցադիմումը վարչական դատարան, որով վիճարկելու ենք սահմանափակումների առնվազն մի մասը, որը վերաբերում է անվտանգության աշխատակիցներին նկարահանելու, տեսանկարահանելու արգելքին, որը որևիցե կերպ չի տեղավորվում սահմանադրականության, տրամաբանության մեջ»,-ասաց Իոաննիսյանը։

Ժուռնալիստների «Ասպարեզ» ակումբի նախագահ Լևոն Բարսեղյանի խոսքով, լրագրողների ու լրատվամիջոցների գործունեության որևէ սահմանափակում կարող է լինել միայն ողջամիտ հիմնավորմամբ՝ անհրաժեշտ ու բավարար պայմանների ապահովմամբ, այն չի կարող լինել կամայական՝ անգամ եթե սահմանափակումն իրականացվում են իրավական ակտերով։

«Բռնապետությունները կամ բռնապետական ռեժիմներն ինչ-որ հատուկ ազդարարմամբ չեն ներդրվում որպես կանոն»,- ասաց Բարսեղյանը՝ մեջբերելով ԱԺ պատգամավոր Վլադիմիր Վարդանյանի խոսքերը, թե «ծեծկռտուք լուսաբանելը լրագրողների գործն է»։
Բարսեղյանի խոսքերով, ոչ մի փոխզիջում չի կարող լինել լրագրողների, լրատվամիջոցների իրավունքների սահմանափակման դեպքերի մասով։

«Շատ զարմանում եմ, որ մենք բոլորս զարմանում ենք։ Ինչի՞ վրա ենք զարմանում։ Այս տենդենցը նո՞ր է։ 3 տարի առաջ դեռևս լրատվամիջոցների ղեկավարները, մեդիա-կազմակերպություններ  հայտարարություններ են չէ՞ արել բազմաթիվ առիթներով՝ սկսած նրանից, որ սոցիալական ցանցերը մի օգտագործեք պաշտոնական տեղեկատվություն հաղորդելու համար։ Հաշվի՞ է առնվել, իհարկե, ոչ։ Զարմանում ե՞ք, որ թիրախավորվում են լրագրողներն ու լրատվամիջոցները, մի զարմացեք, ի սկզբանե այդպես է եղել ու հիմա շարունակվում է»,- այս մասին քննարկմանն ասաց Ժուռնալիստների միության նախագահ Սաթիկ Սեյրանյանը, հավելելով, որ ավելի վատ սահմանափակումներ են լինելու, «քանի որ այս իշխանությունը՝ նախկին գործընկեր Նիկոլ Փաշինյանը շատ լավ է հասկանում մեդիայի դերը»։

Սաթիկ Սեյրանյանի խոսքերով, բոլոր սահմանափակումները պետք է անհապաղ վերացվեն, որոնք միայն մամուլի աշխատողների խնդիր չէ, այլ պատգամավորների գործունեության թափանցիկության հարցն է, հաշվետվողականության, մեդիայի աշխատանքի հարցն է։