Ձեր վստահելի աղբյուրը

Ռուսաստանի և Տաջիկստանի ՀՕՊ միասնական տարածաշրջանային համակարգի ստեղծման համաձայնագիրը վավերացման ընթացակարգի մեջ է, նմանատիպ նախագծեր են քննարկվում Ղրղզստանի, Ղազախստանի և Հայաստանի հետ: Այդ մասին, Tass-ի հաղորդմամբ, ԱՊՀ երկրների պաշտպանության նախարարների խորհրդին առընթեր հակաօդային պաշտպանության համակարգող կոմիտեի հանդիպման արդյունքներով հայտարարել է համակարգող կոմիտեի նախագահի տեղակալ, գեներալ-գնդապետ Յուրի Գրեխովը։

«Ռուսաստանի Դաշնության և Տաջիկստանի Հանրապետության ՀՕՊ միասնական տարածաշրջանային համակարգի ստեղծման մասին համաձայնագիրը, որը ստորագրվել է 2021 թվականի ապրիլի 27-ին, վավերացման փուլում է», - ասել է նա:

Գրեխովը նաև նշել է, որ Ռուսաստանի և Ղրղզստանի ՀՕՊ միասնական տարածաշրջանային համակարգի ստեղծման մասին համաձայնագրի նախագիծը ներկայումս ներքին համակարգման ընթացակարգ է անցնում: Այս աշխատանքների ավարտից հետո համաձայնագրի նախագիծը ստորագրման կներկայացվի երկու երկրների պաշտպանության նախարարներին:

Նաև, ըստ գեներալ-գնդապետի, «աշխատանքները շարունակվում են Ռուսաստանի Դաշնության և Հայաստանի Հանրապետության, Ղազախստանի Հանրապետության միջև պայմանագրերի գործնական իրականացման ուղղությամբ»:

Այժմ ԱՊՀ միասնական ՀՕՊ համակարգի ուժերն ու միջոցները ներառում են 19 ավիացիոն ստորաբաժանում, 38 միավոր զենիթահրթիռային ուժեր, 15 միավոր ռադիոտեխնիկական զորքեր, 9 ՀՕՊ բրիգադ և ռադիոէլեկտրոնային պայքարի երեք ստորաբաժանում։ Այդ ուժերի և միջոցների կառավարումն իրականացնում են ազգային հրամանատարությունները, իսկ համատեղ գործողությունների համակարգումը՝ ՀՕՊ համակարգող կոմիտեի նախագահը: