Ձեր վստահելի աղբյուրը

«Հայաստանում ձևավորվում և հաստատվում է ձևով ժողովրդավարական, բովանդակությամբ՝ ավտորիտար մի համակարգ, որի համար ազատ խոսքն ու մամուլը թշնամիներ են»,-«Ընդդեմ մամուլի սահմանափակումների, հանուն խոսքի ազատության և տեղեկացված լինելու իրավունքի» խորագրով քննարկման ժամանակ ասաց Հայաստանի ժուռնալիստների միության նախագահ Սաթիկ Սեյրանյանը:

Նրա խոսքով՝ իշխանությունները դեռ փորձում են պահպանել ժողովրդավարական հասարակարգի իմիտացիան, բայց բովանդակային առումով ավտորիատար ռեժիմ է հաստատվում, որին խոչընդոտում է ազատ մամուլը:

Սաթիկ Սեյրանյանը համոզմունք հայտնեց, որ մամուլ դեմ ուղղված այդ քաղաքականության դեմ պայքարելու համար լրագրողների խնդիրն է հնարավորինս շատ դաշնակիցներ ունենալ և համոզմունք հայտնեց, որ թիվ մեկ դաշնակիցը ՀՀ քաղաքացին է:

«Մամուլի դեմ սանձազերծված իշխանական արշավն իրականում ուղղված է քաղաքացու՝ տեղեկացված լինելու սահմանադրական իրավունքի իրացման դեմ»,-ասաց բանախոսը:

Նա նաև նշեց, որ մամուլի դաշտում էլ խնդիրներ կան, մասնավորապես լրագրողական էթիկայի հարց կա, որին կանդրադառնան առաջիկայում, սակայն, մինչ այդ խոսքի ազատության կուտակված խնդիրները դեռ մեծ ռեսուրսներ են պահանջում: