Ձեր վստահելի աղբյուրը

Կառավարության որոշմամբ ամրագրվել է կալանավորված անձանց և դատապարտյալներին ծանրոցներ, փաթեթներ հանձնելու նոր արդյունավետ եղանակ՝ համացանցի միջոցով ուղարկելու հնարավորությունը։ Այս որոշումն ընդունվեց ՀՀ կառավարության այսօրվա նիստին:

ՀՀ արդարադատության նախարար Արփինե Հովհաննիսյանը նշեց, որ կալանավորներին ու դատապարտյալներին ծանրոցներ ներկայումս ընդունվում են քաղաքացիների կողմից քրեակատարողական հիմնարկներ բերելու միջոցով, ինչն ավելորդ դժվարություններ է առաջացնում։ ««Նախ դժվարություն է ստեղծում հարազատի համար, երկրորդ՝ ՔԿՀ-ներում արգելված որոշ առարկաների ներմուծման հնարավորություն է տալիս, ինչը բացառելու համար տարվում է երկար ստուգում, երրորդ` առկա է ՔԿՀ-ի ծառայողի և դատապարտյալի հարազատի շփման միջոցով կոռուպցիոն ռիսկերի առաջացում։ Այժմ մենք նախագծով առաջարկում են այդ ամենը կատարվի էլեկտրոնային միջոցով` պատվեր ուղարկելու միջոցով»,- ասաց Ա.Հովհաննիսյանը:

Պատվերը կընդունի «Աջակցություն դատապարտյալին» հիմնադրամը և կկապվի ՔԿՀ-ի վարչակազմի հետ։

Առցանց պատվեր կատարելու համար պատվիրատուն կայքէջի «կատարել պատվեր» կոճակի միջոցով ձևակերպում է պատվերի հայտը՝ նշելով անուն, ազգանուն, հայրանուն, էլեկտրոնային փոստի հասցե, քրեակատարողական հիմնարկի անվանումը, կալանավորված անձի կամ դատապարտյալի անուն, հայրանուն և ազգանունը, ծննդյան օրը, ամիսը և տարեթիվը:

Առցանց պատվերը ստանում է հիմնադրամը և փոխանցում է համապատասխան քրեակատարողական հիմնարկի վարչակազմին: Համապատասխան քրեակատարողական հիմնարկի ծառայողը ստուգում է կալանավորված անձի կամ դատապարտյալի առկայությունը տվյալ քրեակատարողական հիմնարկում, ստանում է կալանավորված անձի կամ դապատապարտյալի գրավոր համաձայնությունը՝ ծանրոցներ, հանձնուքներ և փաթեթներ ընդունելու մասին, իսկ կալանավորված անձի դեպքում նախքան համաձայնությունը ստանալը ստուգում է տվյալ կալանավորված անձի համար տվյալ ամսվա ծանրոցի, հանձնուքի և փաթեթի թույլատրելի քաշի առկայությունը:

Ընդ որում, կալանավորված անձը կամ դատապարտյալը կարող է որոշակի ժամկետով հետաձգել պատվերի ընդունումը կամ մասնակի ընդունել կամ փոխարինել պատվերի առարկան՝ նախապես հիմնադրամի աշխատակցի միջոցով ստանալով պատվիրատուի համաձայնությունը։ Առցանց պատվերի հայտը մերժման դեպքում քրեակատարողական հիմնարկի պետը կամ նրա հանձնարարությամբ այլ ծառայողը կայացնում է համապատասխան որոշում՝ նշելով պատվերի հայտը մերժելու պատճառները, անունը, ազգանունը, պաշտոնը և կոչումը։ Առցանց պատվերի հայտը մերժելու մասին որոշման կայացումից հետո քրեակատարողական ծառայողը որոշման պատճենը մեկ աշխատանքային օրվա ընթացքում հանձնում է հիմնադրամին։ Հիմնադրամի աշխատակիցը մեկ աշխատանքային օրվա ընթացքում առցանց պատվերի հայտը մերժելու մասին որոշման պատճենը հետադարձ ծանուցմամբ ուղարկում է պատվիրատուին։