Ձեր վստահելի աղբյուրը

Ադրբեջանի նախագահի օգնական Հիքմեթ Հաջիևը հայտարարել է, թե Ադրբեջանը և Ռուսաստանը քննարկում են լրացուցիչ իրավական մեխանիզմներ` կապված Արցախում ռուս խաղաղապահների մանդատի հետ: Այս մասին գրում է Interfax.az-ը։

«Ինչ վերաբերում է խաղաղապահների մանդատի վերաբերյալ լրացուցիչ համաձայնագրերին և լրացուցիչ իրավական մեխանիզմներին, ապա այդ առումով կողմերի միջև եղել են նախնական շփումներ, և որոշակի քննարկումներ դեռ շարունակվում են», - ասել է Հաջիևը BBC-ին տված հարցազրույցում:

Ըստ Հաջիևի, Արցախում ռուս խաղաղապահների գործունեությունն ու գործողություններն իրականացվում են նոյեմբերի 10-ի եռակողմ հայտարարության համաձայն, որը ստորագրել են Ադրբեջանի, Ռուսաստանի և Հայաստանի ղեկավարները:

Հաջիևն ասել է, որ նոյեմբերի 10-ի եռակողմ հայտարարությունը խաղաղապահ ուժերի համար սահմանում է «քաղաքական և որոշակի չափով իրավական շրջանակ»:

«Ամբողջ Ղարաբաղը Ադրբեջանի ինքնիշխան տարածքն է, միջազգային հանրությունը ճանաչում է Ադրբեջանի տարածքային ամբողջականությունը և ինքնիշխանությունը, և համաձայն նոյեմբերի 10-ի հայտարարության՝ խաղաղապահ ուժերը ժամանակավորապես տեղակայվում են Ադրբեջանի Ղարաբաղի շրջանի որոշակի հատվածում», - հայտարարել է Հաջիևը։

Հիշեցնենք, որ 2020թ․-ի սեպտեմբերի 27-ին Ադրբեջանի կողմից Արցախի դեմ սանձազերծված 44-օրյա պատերազմի արդյունքում Ադրբեջանն օկուպացրել է Արցախի բնակավայրերը։ Նոյեմբերի 9-ի հրադադարի եռակողմ հայտարարությամբ Արցախում տեղակայվեցին ՌԴ խաղաղապահ ուժերը, սակայն Ադրբեջանը մինչ այժմ չի ստորագրել խաղաղապահների մանդատը։

Հրադադարից հետո միջազգային ուժերը, այդ թվում ԵԱՀԿ Մինսկի խմբի համանախագահներ ԱՄՆ-ն, Ֆրանսիան հայտարարում են, որ հակամարտությունը կարգավորված չէ, անհրաժեշտ է սկսել բովանդակային բանակցություններ ԵԱՀԿ Մինսկի խմբի ներքո, հասնել հակամարտության համապարփակ կարգավորման՝ ներառյալ Արցախի կարգավիճակի հարցի լուծում։ Ռուսաստանը կարծում է, որ ԼՂ կարգավիճակի հարցը ներկայումս վաղ է քննարկել՝ առաջ տանելով տրանսպորտային կապերի ապաշրջափակման հարցը։