Թուրքիան չի շտապի «Թալիբանի» կառավարությունը ճանաչելու հարցում

Քաղաքական 15:14 07/09/2021 Աշխարհում

Թուրքիան չի շտապի Աֆղանստանում «Թալիբանի» կառավարությունը ճանաչելու հարցում, այն պետք է տարբեր քաղաքական ուժեր ներառի։ Այս մասին գրում է «ՌԻԱ նովոստի» գործակալությունը, վկայակոչելով Թուրքիայի ԱԳ նախարար Մևլյութ Չավուշօղլուն։

«Ճանաչում է արդյո՞ք Թուրքիան «Թալիբանը»: Եկեք հապճեպ որոշումներ չկայացնենք: Պետք է, որ ստեղծվի բոլոր քաղաքական ուժերի ներգրավվածությամբ կառավարություն, որը կարող է կարգավորել ստեղծված ճգնաժամը և թույլ չտա քաղաքացիական պատերազմի հրահրում: Որպեսզի ողջ աշխարհը ճանաչի «Թալիբանը», պետք է ապահովել նման կառավարության ստեղծումը»,- ասել է թուրք նախարարը:

Նրա խոսքով՝ աշխարհին ներկայացված կառավարության կազմում միայն «Թալիբանի» ներկայացուցիչներ են ընդգրկվել:

Վերջինս հավելել է, որ Թուրքիան դեևս հրավեր չի ստացել մասնակցելու միջոցառմանը՝ նվիրված նոր աֆղանական կառավարության կազմի հայտարարմանը:

Հիշեցնենք, որ թալիբներն ակտիվ գործողությունների են անցել երկրից ամերիկյան զորքերի դուրսբերմանը զուգահեռ՝ մի շարք նահանգներ և քաղաքներ գրավելով՝ նաև սահմանամերձ շրջաններում: Օգոստոսի 15-ին թալիբները մտել են մայրաքաղաք Քաբուլ, ինչից ժամեր անց երկրի նախագահ Աշրաֆ Ղանին հեռացել է երկրից: «Թալիբանն» ավելի ուշ հայտնել էր 12 անձից կազմված կառավարման խորհուրդ ստեղծելու մասին: Օրերս հայտնի է դարձել, որ թալիբների կազմած նոր կառավարությունը գլխավորելու է մոլլա Աբդուլ Ղանի Բարադարը:

Հարակից հրապարակումներ`

Չավուշօղլու. Թուրքիան Կատարի և ԱՄՆ-ի հետ աշխատում է Քաբուլի օդանավակայանի կառավարման ուղղությամբ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: