Ձեր վստահելի աղբյուրը

Ռուսական խաղաղապահ զորախմբի զինծառայողներն ապահովել են ավելի քան 60 ուխտավորների անվտանգությունը Արցախի սահմանազատման գծի մոտ գտնվող Ամարաս վանական համալիր այցելելիս: Լուրը հայտնել է ՌԴ ՊՆ-ն:

«Ռուսական խաղաղապահ զորախմբի անձնակազմը Ամարասի համալիրում իրականացնում է ուխտավորների անվտանգության ապահովման խնդիրը: Ուխտավորները ժամանում են ինչպես կենտրոնական շարասյունով, այնպես էլ անձնական մեքենաներով»,-ասել է ռուսական խաղաղապահ զորախմբի ներկայացուցիչ Վիկտոր Կուլիկովը:

Ըստ հաղորդագրության՝ խաղաղապահները ապահովում են ուխտավորների անվտանգությունը ճանապարհին, Ամարասի վանական համալիր մտնելու և եկեղեցական ժամերգությունների ժամանակ:

«Մենք եկել էինք Հայաստանից, շատ էինք ուզում գալ, բայց վտանգի և գալու հնարավորության հետ կապված խնդիրներ կային, սակայն խաղաղապահների շնորհիվ մենք կարողացանք խաղաղությամբ գալ այստեղ: Խաղաղապահները շատ հարգալից են մեզ հետ, ինչի համար շնորհակալություն ենք հայտնում: Մենք ամբողջ ճանապարհը հանգիստ անցանք, պարզապես մեզ համար հոգեբանորեն ծանր է, բայց մենք տեսնում ենք, որ խաղաղապահները կատարում են իրենց առջև դրված խնդիրները, և մենք դրանից մեզ հարմարավետ ենք զգում: Նրանք շատ մեծահոգի են և նույնիսկ հայերենով հետաքրքրվում էին մեր բարեկեցությամբ: Շնորհակալ եմ նրանց դրա համար»,-ասել է ուխտագնաց Գայանե Մխիթարյանը:

«Խաղաղապահների շնորհիվ անվտանգության առումով այժմ ամեն ինչ կարգին է, յուրաքանչյուր հիմնական ծիսակատարության ժամանակ նրանք այստեղ են: Եկեղեցական արարողությունները կատարվում են խաղաղ պայմաններում: Ես գրեթե մշտապես ապրում եմ այստեղ, ուխտավորները գալիս են տարբեր վայրերից: Ամեն դեպքում, Ռուսաստանը միշտ այստեղ է եղել: Տեսնելով ռուսական դրոշները՝ մենք մեզ ազատ ենք զգում, զգում ենք բարեկամություն և, որ ամենակարևորն է՝ անվտանգություն»,-ասել է Ամարասի սարկավագ Վիլեն Գրիգորյանը:

ՌԴ ՊՆ-ն հայտնում է, որ ռուս խաղաղապահները Ստեփանակերտից դեպի Մարտունու շրջան են ուղեկցել ուխտավորներին, որոնք մասնակցեցին Հայ Առաքելական եկեղեցու վանքում մատուցված պատարագին: