Ձեր վստահելի աղբյուրը

Չեխիայի վարչապետ Անդրեյ Բաբիչը հայտարարել է, որ Եվրամիությունում աֆղան փախստականների համար «իսկապես տեղ չկա», առաջարկելով «գտնել լուծում, որը թույլ կտա նրանց մնալ Աֆղանստանում»: Այս մասին գրում է Euronews-ը։

Բաբիչն այս մեկնաբանություններն արել է նախօրեին՝ Ավստրիայի կանցլեր Սեբաստիան Կուրցի և Սլովակիայի վարչապետ Էդուարդ Հեգերի հետ հանդիպումից հետո:

ԵՄ առաջնորդները հայտարարել են, որ պատրաստ են օգնել աֆղան փախստականներին թալիբների՝ իշխանության գալուց հետո, բայց միայն նրանց, ովքեր փախել են հարևան երկրներ:

«Նրանց համար Եվրոպայում իսկապես տեղ չկա։ Տարբերակներից մեկն այն է, որ անցյալի պես բանակցություններ վարեն [Թուրքիայի նախագահ Ռեջեփ Թայիփ] Էրդողանի հետ, բայց ես չեմ կարծում, որ սա լավ լուծում է: Ավելի լավ տարբերակ է այն լուծումը, որը թույլ է տալիս մարդկանց մնալ Աֆղանստանում», - ասել է Բաբիչը՝ Չեխիայի հարավարևելյան Լեդնիցե ամրոցում:

Նշվում է, որ 2016-ին ԵՄ-ն միգրացիոն գործարք կնքեց Թուրքիայի հետ, որով Անկարան խոստացավ կանխել միլիոնավոր հիմնականում սիրիացի փախստականների փախուստը Եվրոպա` ֆինանսավորման դիմաց` ավելի քան երեք միլիոն ներգաղթյալների ընդունման համար: Այս գործարքը, սակայն, հնարավորություն տվեց Էրդողանին բազում հարցերում շանտաժի ենթարկել Եվրամիությանը։

Աֆղանստանում իրավիճակի սրման ֆոնին էրդողանը հայտարարել էր, որ Թուրքիան չի պատրաստվում դառնալ Եվրոպայի համար փախստականների փահեստի։