Ձեր վստահելի աղբյուրը

«Հենակետ» վերլուծական կենտրոնն ամփոփել ու հրապարակել է համառոտ տեղեկություններ ընթացիկ շաբաթվա ընթացքում մամուլում և սոցիալական ցանցերում անվտանգության վերաբերյալ շրջանառվող լուրերի մասին.

«Հայ-ադրբեջանական սահմանների շուրջ ծավալվող զարգացումների  մասին

Շաբաթվա սկզբնամասում հայկական մեդիատիրույթում ու սոցիալական ցանցերում առավել ակտիվ քննարկվում էր Բերձորի շրջանում մեկնարկած Ադրբեջանի ու Թուրքիայի համատեղ զորավարժությունների թեման։ Փորձագիտական շրջանակների կողմից զորավարժությունները բնութագրվել են որպես սադրանք և նշվել նոր հնարավոր սպառնալիքների մասին։

Թեմային արձագանքել է նաև ՀՀ ԱԳՆ-ն՝ թուրք-ադրբեջանական զորավարժությունների անցկացումը գնահատելով որպես դեէսկալացիային միտված քայլերին վնասող գործողություն։
Հայկական լրատվական կայքերից մեկի տեղեկություններով՝  Տավուշում գտնվող ռուս սահմանապահները մարզում արդեն տարածք են ընտրել՝ կառուցելու իրենց նոր ուղեկալները։ Ազատամուտ համայնքի ղեկավարը հաստատել է, որ ռուս սահմանապահները արդեն ունեն որոշումը, թե որտեղ են տեղակայվելու։

Երեկվանից համացանցում ակտիվ քննարկվում էր Որոտանի ճանապարհային  հատվածում ադրբեջանցիների կողմից ոստիկանական կետի տեղադրման լուսանկարները։ Սյունիքի մարզպետ Մելիքսեթ Պողոսյանը՝ անդրադառնալով այդ թեմային, նշել է, որ Որոտանի հատվածի իրենց տարածքում են ադրբեջանցիները ոստիկանական կետ տեղադրել: Ըստ մարզպետի՝ ոչ մի վտանգ դա չի ներկայացնում իրենից, ռուսների հսկողության տակ է։

Պողոսյանի հայտարարությունը քննադատության է արժանացել փորձագիտական շրջանակների կողմից։ Կարծիքների համաձայն՝ ադրբեջանցիներն ամենատարբեր նկատառումներով կարող են այդ ճանապարհը վերջնականապես փակել և լուրջ խնդիրներ ստեղծել, իսկ մեր իշխանությունների կողմից  այդ ուղղությամբ համարժեք քայլեր չեն իրականացվում։

Ռազմագերիների, անհետ կորած, զոհված զինծառայողների հետ կապված հարցերի մասին

Սեպտեմբերի 7-ին 56 օր  Սև լճի տարածքից անհետ կորած համարվող Արթուր Նալբանդյանն ու Արամայիս Տոռոզյանը Բաքվից վերադարձել են Երևան։ Նրանց հայրենիք վերադարձնելու համար Բաքու է մեկնել Արցախում ռուսական խաղաղապահ զորակազմի հրամանատար, գեներալ-լեյտենանտ Ռուստամ Մուրադովը։

2 հայ գերիների փոխարեն Երևանը Բաքվին է փոխանցել Արցախում պահվող կալանավորված ադրբեջանցի զինծառայող Ջամիլ Բաբաևին, որը օգոստոսի 25–ին ապօրինի հատել էր սահմանն ու մտել Արցախի Մարտակերտի շրջանի տներից մեկը։

Սեպտեմբերի 8-ի ՀՀ մարդու իրավունքների պաշտպան Արման Թաթոյանը և ՄԻԵԴ-ում Ադրբեջանում գտնվող հայ ռազմագերիների շահերի ներկայացուցիչ, իրավապաշտպան Սիրանուշ Սահակյանը լրագրողների հետ հրավիրված ասուլիսում մանրամասներ են ներկայացրել անգլերենով կազմված արտահերթ զեկույցից, որը վերաբերում է Ադրբեջանի պետության պատասխանատվությանը հայ գերիների իրավունքների կոպիտ խախտումներին, ադրբեջանական զինված ուժերի կողմից նրանց խոշտանգելուն ու անմարդկային վերաբերմունքի ենթարկելուն, գերեվարման պայմաններին, քաղաքացիական անձանց իրավական պաշտպանությանը:

Ըստ Թաթոյանի՝ թե՛ քաղաքացիական անձինք, թե զինծառայողները համատարած ենթարվել են խոշտանգման։ Բազմաթիվ են եղել դեպքերը, երբ մարդկանց զրկել են ջրից ու սննդից, որը տրամադրել են նվաստացումներից ու դաժան ծեծից հետո։ Եղել են դեպքեր, երբ սնունդը գցել են գետնին ու ստիպել են ուտել հատակից կամ սոված ռազմագերու աչքի առաջ սնունդը գցել են աղբամանի մեջ։ Եղել են դեպքեր, երբ ուտելու համար տվել են 10 վայրկյան և անկախ նրանից, թե ռազմագերին հասցրել է հացը ուտել, թե ոչ, գցել են աղբամանի մեջ։ Եղել են դեպքեր, որ թքել են սննդի մեջ ու ռազմագերուն ստիպել ուտել։

Նրա խոսքով`առանձնակի դաժան են վերաբերվել բժշկական հետազոտությունների ժամանակ։ Հայ գերիներին ստիպել են տանել ցավը։ Հաճախ ծեծն ու խոշտանգումը եղել է հենց վերքի վրա մատը դնելով, խփելով, որ էլ ավելի ցավի։ Ստիպել են, որ մարդիկ խնդրեն, աղաչեն բժշկական օգնություն ու սնունդ։

Թաթոյանի խոսքով`հատուկ դաժան են վերաբերվել այն զինծառայողներին, որոնք մասնակցել են Ապրիլյան պատերազմին կամ Արցախյան առաջին պատերազմին։

Իրավապաշտպան Սիրանուշ Սահակյանն էլ նշել է, որ գերիների խնդիրներից զատ կյանքի իրավունքի պաշտպանության հարցերով այս պահին ներկայացրել են 38 գանգատ, սակայն ուսումնասիրում են մի քանի տասնյակ գործեր, որտեղ ունեն նախնական փաստեր, որ սպանվել են գերեվարված անձինք, սակայն պարզապես սպասում են փորձաքննությունների արդյունքներին։
Ըստ իրավապաշտպանի՝  38 գերիների սպանել են, կասկածներ կան ևս 30 սպանության մասին։
44-օրյա պատերազմում զոհված հերոսների ծնողներին ու հարազատներին վրդովեցրել է սեպտեմբերի 21-ին Հանրապետության Հրապարակում «գունագեղ միջոցառում» անցկացնելու Նիկոլ Փաշինյանի հայտարարությունը:

Նրանք սոցցանցում ֆլեշոբ են սկսել՝ պահանջելով չեղարկել այն՝ նշելով, որ բազմաթիվ ընտանիքներ դեռ փնտրում են իրենց զավակներին կամ հազարավոր երեխաներ սգում են իրենց հայրերի մահը, իսկ գերիները կտտանքների են ենթարկվում Բաքվի բանտերում, ուստի իշխանությունն իրավունք չունի տոնակատարություն կազմակերպել:

Սեպտեմբերի 9-ին ՀՀ Պնախարար Արշակ Կարապետյանը ՊՆ վարչական համալիրում հանդիպել է 44-օրյա պատերազմում անհայտ կորած զինծառայողների ու կամավորների ծնողներին և հարազատներին։ Նախարարը հայտնել է, թե որոնողական աշխատանքները շարունակվում են, ընդ որում՝ հաշվի առնելով նաև ծնողների ունեցած տեղեկությունները։ 

Զոհված զինծառայողների աճյունների որոնողական աշխատանքները շարունակվում են։ Վերջին օրերին Մատաղիսի, Վարանդայի շրջաններից հայտնաբերվել է 5 հայ զինծառայողի աճյուն։
Նշենք, որ Արցախի գրավյալ տարածքներում իրականացված որոնումների արդյունքում հայտնաբերվել և տարհանվել են ընդհանուր 1662 աճյուն, որոնց թվում նաև քաղաքացիական անձինք են:

Այլ թեմաներ

ՀՀ Քննչական կոմիտեից տեղեկանում ենք, որ 44-օրյա պատերազմի ընթացքում ռազմական գործողություններում ներգրավված ՊԲ N զորամասի ուսումնական գումարտակի հրամանատարը կալանավորվել է:

ՊՆ անցուդարձի մասին

ՀՀ կառավարությունը  ՀՀ ՊՆ Տեղեկատվության և հասարակայնության հետ կապերի վարչությունից հայտնում են, որ 2021 թվականի սեպտեմբերի 15-ից մինչև դեկտեմբերի 15-ը հայտարարվում է պահեստազորի առաջին խմբի առաջին կարգում հաշվառված շարքային, ենթասպայական և սպայական կազմերի պահեստազորայինների եռամսյա նոր վարժական հավաքներ: Ըստ անհրաժեշտության, հավաքների մասնակիցները ներգրավվելու են նաև մարտական հերթապահության։

Շաբաթվա ընթացքում ՊՆ զորամիավորումների զորամասերում, տարբեր ստորաբաժանումներում անցկացվել են կրակային պատրաստության պարապմունքներ, կապի վարժանքներ, մարտավարական զորավարժություններ, տեղի են ունեցել շտաբային մարզումներ, հավաք-խորհրդակցություններ։

Շարունակվում են  նաև եռամսյա հավաքների մասնակից պահեստազորայինների մարտական պատրաստության պարապմունքները, իսկ սեպտեմբերի 10-ին հավաքների մասնակիցները մեկնել են մարտական դիրքեր»։