Ձեր վստահելի աղբյուրը

Հոկտեմբերի 17-ին Տավուշի Դիլիջան քաղաքում նշանակված ավագանու ընտրությունները թեժ են լինելու։ Այստեղ առաջադրման համար փաստաթղթեր է ներկայացրել հինգ քաղաքական ուժ։

Միմյանց դեմ այստեղ պայքարելու են իշխող «Քաղաքացիական պայմանագիր», ԱԱԾ նախկին տնօրեն, ԱԺ «Պատիվ ունեմ» խմբակցության ղեկավար Արթուր Վանեցյանի գլխավորած «Հայրենիք» կուսակցությունները, ինչպես նաև «Ապրելու երկիր», «Քաղաքացու որոշում», «Հանրապետություն» կուսակցությունները։

Նկատենք, որ «Ապրելու երկիր» կուսակցությունը ընտրացուցակներ է առաջադրել հինգ համայնքներում՝ Գյումրիում, Տաթևում, Տեղում, Մեղրիում, Դիլիջանում։ ՔՊ-ն կմասնակցի ընտրություններին բոլոր համայնքներում։ «Հանրապետություն» կուսակցությունը բացի Դիլիջանից ընտրացուցակ է առաջադրել նաև Մեղրիում։ Կոմունիստական կուսակցությունը ընտրություններին կմասնակցի Գյումրիում և Գորիսում։

Հիշեցնենք, որ հոկտեմբերի 17-ին համամասնական կարգով  ՏԻՄ ընտրություններ կանցկացվեն Գորիս, Մեղրի, Տաթև, Տեղ, Դիլիջան, Գյումրի համայնքներում։

Թեկնածուների առաջադրումը մեկնարկել էր սեպտեմբերի 2-ին, ավարտվել է սեպտեմբերի 12-ին։ Կուսակցությունների ու դրանց դաշինքների ընտրական ցուցակների գրանցումը կիրականացվի սեպտեմբերի 12-17-ը։

Նախընտրական քարոզչությունը կմեկնարկի սեպտեմբերի 22-ին, կավարտվի հոկտեմբերի 15-ին։ Քվեաթերթիկները կտպագրվեն հոկտեմբերի 7-14-ը։