Ձեր վստահելի աղբյուրը

«Մենք այսօր էլ ունենք մի իրականություն, երբ դատարանները կալանքը կիրառում են առանձին դեպքերում քաղաքական ցուցումներով, առանձին դեպքերում որպես պատժիչ գործիք: Այսօր էլ մեր գործընկերից 3-ը կալանքի տակ են  քաղաքական ցուցումներով, էլի որպես պատժիչ գործիք»,- Ազգային ժողովում ասաց «Հայաստան» խմբակցության անդամ Էլինար Վարդանյանը:

Այնուհետև նա Աժ-ում ներկա Բարձրագույն դատական խորհրդի նախագահի պաշտոնակատար Գագիկ Ջհանգիրյանին հիշեցրեց, որ ժամանակին միասին են աշխատել ու այդ ժամանակ նման տեսակետ էր հայտնել՝  կալանքը դատարանների կողմից չի կարող և չպետք է օգտագործել որպես  պատժիչ գործիք:

«Ձեր տեսակետը որպես իրավաբան գիտնականի՝ որքա՞ն կարող է մեր դատական համակարգը շարունակել այսպես գործել՝ կալանքը որպես ռեպրեսիվ մեքենայի գործիք օգտագործելով»,- հետաքրքրվեց Էլինար Վարդանյանը:

Գագիկ Ջհանգիրյանը հիշեցրեց, որ ասել է՝ ոչ միայն կալանքն է երբեմն օգտագործվում որպես ճնշման գործիք, նաև այս ամբիոնից մի հայտարարություն է արել՝ քանի դեռ Քրեական օրենսգիրքը օգտագործվում է քաղաքական հարցեր լուծելու համար, ուրեմն այդ արդարադատությունը մեր երկրում չի կայանա, այսօր էլ այդ կարծիքին է:

Էլինար Վարդանյանն արձագանքեց. «Քրեական օրենսգիրքն, ինչպես նախկինում, այսօր էլ մնացել է գործող իշխանության ձեռքը որպես քաղաքական ճնշումների գործիք: Մենք այդ փաստն ունենք»:

Նա նշեց, որ այս պահին երեք պատգամավոր հանիրավի կալանքի տակ են:

«Հետևաբար այս իրավիճակում խոսել, որ Հայաստանում արդարադատություն է իրականացվում, միամտություն է և դատարանները շարունակում են առանձին  դեպքերում մնալ գործիք քաղաքական  ճնշումներ իրականացնելու համար»,- ասաց «Հայաստան» խմբակցության անդամը: