Ձեր վստահելի աղբյուրը

Ավստրիայի իշխանությունները չեն ընդունի Աֆղանստանից անգամ մեկ փախստականի: Այս հայտարարությունն արել է Ավստրիայի կանցլեր Սեբաստիան Կուրցը La Stampa թերթին տված հարցազրույցում, որը հրապարակվել է այսօր, գրում է Tass-ը։

«Մենք մեր երկրում չենք ընդունի ոչ մի աֆղան փախստականի։ Դա տեղի չի ունենա, քանի դեռ ես իշխանության եմ»,- ասել է Կուրցը։

Նրա խոսքով, վերջին տարիներին Ավստրիա է ժամանել ավելի քան 44,000 աֆղանստանցի:

«Ավստրիան արդեն ունի աշխարհում չորրորդ ամենամեծ աֆղանական համայնքը։ Մենք իրատեսական դիրք ենք զբաղեցնում. աֆղանցիների ինտեգրումը շատ դժվար է», - ասել է Ավստրիայի կանցլերը:

Նա բացատրել է, որ դժվարությունները կապված են, մասնավորապես, նրանց կրթության՝ հիմնականում ցածր մակարդակի, ինչպես նաև հիմնարար արժեքների տարբերությունների հետ:

Կանցլերն ընդգծել է, որ Ավստրիան «հատուկ ուշադրություն է դարձնում Աֆղանստանի հարևան երկրներին աջակցելուն և 20 մլն եվրո է հատկացնում տարածաշրջանում աֆղաններին պաշտպանություն և օգնություն ցուցաբերելու համար»։