Քաղաքացիներին զրկում են պետպատվերով բուժումից, իսկ նախագահի, վարչապետի, ԱԺ նախագահի ընտանիքներին՝ ապահովում. Մանուկյան
«Հայաստանի բազմաթիվ քաղաքացիներ, այդ թվում առողջական խնդիրներ ունեցող զինծառայողները, զրկված են պետպատվերով անվճար կամ արտոնյալ պայմաններով բժշկական օգնության և սպասարկման հնարավորությունից: Այդպես լինելու է մինչև 2022 թվականը, պատճառը՝ փողի բացակայությունն է»,- Ազգային ժողովում հայտարարեց «Հայաստան» խմբակցության անդամ Արեգնազ Մանուկյանը:
Նա նշեց, որ առողջապահության նախարարը ստեղծված իրավիճակը բացատրում է բյուջետային գերծախսերով. «Ասում են հիվանդների, հետազոտվողների քանակը պետական բյուջեով նախատեսվածից շատ է, դա է պատճառը, որ իրենք բժշկական կենտրոններին առաջարկել են հիվանդներին հերթագրել և ըստ հրատապության բուժում կազմակերպել: Հիմա պատկերը հետևյալն է՝ հիվանդներին պետպատվերով չեն սպասարկում, շատ չնչին են բացառությունները: Սա բառի բուն իմաստով հանցագործություն է, մարդու իրավունքների կոպտագույն խախտում է և պետական կառավարման համակարգի ֆիասկո: Սա աննախադեպ երևույթ է»:
Ընդդիմադիր պատգամավորի խոսքով, ժողովրդի անունից հանդես եկող, բյուջետային աննախադեպ մուտքերով գլուխ գովող իշխանությունը հայտարարում է, որ բյուջեի գումարները պետպատվերի մասով սպառվել է, ինքը քաղաքացիներին, այդ թվում հպարտներին, առաջարկում է հերթագրվել բժշկական կենտրոններում, սպասել իրենց հերթին մինչև 2022 թվականը:
«Պատկերացնում եք՝ սրտի հետ կապված անհետաձգելի վիրահատության կամ քաղցկեղի հետազոտության կարիք ունեցողին առաջարկում են սպասել ու այս ամենը իշխանական պատգամավորների գերթանկարժեք հանգստի, իրենց կյանքի որակի կտրուկ փոփոխության, իշխանավորների անվտանգությանը վերաբերող գերծախսերի ֆոնին»,- ասաց Ա. Մանուկյանը:
Նա նշեց, որ կառավարությունը Սահմանադրությամբ և օրենքով ամրագրված դրույթներով պարտավոր է միջոցներ գտնել ու ապահովել մարդկանց կյանքին ու առողջությանը սպառնացող հիվանդությունների բուժումը, թե չէ ինչ է նշանակում՝ հերթագրվել ու սպասել:
«Այս ամենի ֆոնին «ժողովրդական» է հնչում Փաշինյանի աշխատակազմի նախաձեռնությունը, որով առաջարկվում է պետական բյուջեի հաշվին նախագահի, վարչապետի և ԱԺ նախագահի ընտանիքներին բուժօգնությամբ ապահովել, բացի այդ առաջարկվում է անձնական բժշկով ապահովել ԱԺ նախագահին: Սա՞ է «ապագա կա» կարգախոսի գործնական կիրառումը:
Հարցս հռետորական է»,- ասաց Արեգնազ Մանուկյանը:
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
