Ձեր վստահելի աղբյուրը

Ազգային ժողովում Գորիս-Կապան ճանապարհին ստեղծված իրավիճակի հարցով փակ նիստ անցկացնելու պայմանավորվածություն է ձեռք բերվել: ԱԺ-ում լրագրողների հետ զրույցում նշեց «Հայաստան» խմբակցության քարտուղար Արծվիկ Մինասյանը։

«Երեկ մենք «Հայաստան» խմբակցության անունից գրությունն ուղարկել ենք, որտեղ մատնանշել ենք կարևորությունը, հրատապությունը և հարցերի մի խումբ, որոնք վերաբերում է անվտանգությանը, պաշտպանվածությանը, տնտեսական բաղադրիչին, մարդու իրավունքների խախտումներին և առաջարկել ենք, որ ներկա գտնվեն առաջին դեմքերի մակարդակով պաշտպանության նախարարը, ԱԳ նախարարը ԱԱԾ տնօրենը, գլխավոր դատախազը, մարդու իրավունքների պաշտպանն ու ՊԵԿ նախագահը: Շատ կարևոր է, որ մենք ամբողջականորեն, լիարժեքորեն ստանանք տեղեկատվություն: Հնարավոր է, որ այստեղ պետական գաղտնիքի տարրեր լինեն, մենք պատրաստ ենք բաց կամ փակ քննարկման: Գլխավոր խնդիրը պետության առջև ծառացած այս մարտահրավերներն են»,-ասաց նա:

Ա. Մինասյանի խոսքով, բոլոր ուղղություններով կա անելիքներ, ամենապարզ  օրինակն այն, էր այսօր խախտվում է  ՀՀ ինքնիշխանությունը. «Ըստ էության, մենք  այդ տարածքում կորցրել ենք մեր ինքնիշխանությունը, տարածքային ամբողջականությունը խախտված է, այդ հարցով միանշանակ քրեական գործը պետք է հարուցված լինի, սպասում ենք, որ գլխավոր դատախազն  այս հարցերին պատասխան տա, ԱԳՆ-ն՝ արդյո՞ք անհրաժեշտ աշխատանքներ տարվում են իրանական կողմի հետ, թե՞ ոչ, միջազգային հարթակներում ինչպիսի՞ գործընթացներ են իրականացվում, արդյո՞ք որևէ պայմանավորվածություն՝ բանավոր կամ գրավոր եղել է այդ տարածքների վերաբերյալ, որպեսզի կարողանանք հասկանալ, թե  ինչ կենդանու հետ գործ ունեն»:

Արծվիկ Մինասյանը հայտնեց, որ իրենց գրությանը ԱԺ ղեկավարության կողմից ընթացք է տրվել, որոշվել է՝ լինելու է փակ քննարկում, ձգտելու են անպայման լինեն առաջին դեմքերը, պետք է կազմակերպվի հնարավորինս արագ՝ այսօր կամ վաղն է լինելու՝ կախված է լինելու, թե ինչպես են գործադիր իշխանության ներկայացուցիչներին ներգրավում:

«Եթե  չհաջողվի կազմակերպել, օրենքով նախատեսված կարգով պահանջ ենք առաջադրելու, որպեսզի իրավասու հանձնաժողովներն այդ գործողությունները ձեռնարկեն»,- ասաց «Հայաստան» խմբակցության քարտուղարը:

Ա. Մինասյանի խոսքով, ամբողջ պաշտպանական, անվտանգության համակարգը մի խառնաշփոթ վիճակի մեջ է դրված:

«Բոլոր այս հարցերին պետք է պատասխանեն պատասխանատուները: Ի վերջո ի՞նչ գործ ունի ադրբեջանական ոստիկանությունը Հայաստանի ինքնիշխան տարածքում: Հիմա էլ ցինիկաբար հայտարարում են, որ իրենց հարկային օրենսգրքի շրջանակներում են գործում: Սրանք բոլորը հանցակազմ են պարունակում, միջազգային հանցագործություններ ենթադրող արարքներ են: Այս ուղղղությամբ հայկական կողմը պետք է քայլեր ձեռնարկի: Եթե իշխանությունն ի վիճակի չէ կամ գտնվում է պարփակված վարքագծի մեջ, որ չի կարողանում այդ գործողությունը ձեռնարկել, նշանակում է` մենք բոլորս անելիք ունենք առնվազն Հայաստանի, Արցախի անվտանգությունը գոնե եղած այսօրվա պայմաններում  առաջ մղենք»:

Հարցին՝ եթե պայմանավորվածությունների արդյունք չէ, պատրա՞ստ եn աջակցել իշխանություններին, նա ասաց. «Եթե դա պայմանավորվածությունների արդյունք չէ, եթե տեսնում ենք, որ  քրեական հանցակազմ չպարունակող վիճակ է, բնականաբար, մեր հայրենիքն է:  Անգամ եթե քրեական հանցակազմ պարունակող լինի, մենք պետք է հասնենք նրան, որ այս մարդկանց մեկուսացնենք, հեռացնենք այդ լծակներից, որ կարողանանք հայ ժողովրդի շահը առաջ մղենք:

Մենք որևէ շոուի ցանկություն չունենք, կարիք ունենք մեր ամբողջական ռեսուրսը համախմբել մեր անվտանգության հարցերի շուրջ:

Եթե այդ անվտանգության կենտրոնական սպառնալիքը, առնվազն առերևույթ, իշխանությունն է, ապա իշխանությունը պետք է հեռացվի, որպեսզի կարողանանք լուծում տալ։ Եթե նրանք բավարար փաստարկներ, հիմնավորուներ կբերեն, որ դա, այնուամենայնիվ, արտածին դրսևորում է և անհրաժեշտ է պայքարել դրա դեմ, ուրեմն պետք է պայքարել»,-ասաց Արծվիկ Մինասյանը: