Ձեր վստահելի աղբյուրը

Սեպտեմբերի 15-ին, 16-ին, 22-ի և 23-ին Տավուշի մարզի` Պառավաքար և Վազաշեն գյուղերի  դպրոցների 52 աշխատակից   «Հայ-ամերիկյան առողջության կենտրոն» հիմնադրամում թվայնացված մամոգրաֆիա և կրծքագեղձի ու ավշային հանգույցենրի սոնոգրաֆիա   հետազոտությունները կանցնեն անվճար: 

Սա Genesis Armenia ուղեղային կենտրոն/հիմնադրամի և «Հայ-Ամերիկյան Առողջության Կենտրոն» հիմնադրամի  համատեղ նախաձեռնությունն է: 

«Ջենեսիս  Արմենիա» ուղեղային կենտրոն հիմնադրամի տարածած հաղորդագրության մեջ մանրմասնվում է, որ կրծքագեղձի քաղցկեղը կանանց շրջանում ամենատարածված ուռուցքային հիվանդությունն է: Հիվանդացության ցուցանիշը պարբերաբար աճում է ամբողջ աշխարհում: Ցավոք, այդ միտումն առկա է նաև Հայաստանում: Ամեն տարի Հայաստանում գրանցվում է   հիվանդության միջինում  1100 - 1300 նոր դեպք:  

Ու չնայած մտահոգիչ վիճակագրությանը` կրծքագեղձի քաղցկեղը նաև ամենահեշտ բուժվող հիվանդություններից մեկն է, եթե ժամանակին կատարվել է համապատասխան հետազոտություն  և  խնդիրը  բացահայտվել է գոյացության վաղ շրջանում: 

35 տարեկանից բարձր յուրաքանչյուր կնոջ խորհուրդ  է տրվում տարին մեկ անգամ անցնել տվյալ հետազոտությունը:

Ըստ ներկայացված վիճակագրության, 2018-ին Հայաստանում գրանցվել է չարորակ նորագոյացությունների 8441 դեպք: Վերջին երեսուն տարվա ընթացքում հիվանդացությունն աճել է 1.6 անգամ: Վիճակագրական տվյալների վերլուծությունը փաստում է, որ տղամարդկանց շրջանում առավել տարածված են շնչափողի, բրոնխների, թոքի, ստամոքսի, լյարդի, ներլյարդային լեղուղիների և շագանակագեղձի, իսկ կանանց շրջանում՝ կրծքագեղձի, շնչափողի, բրոնխների, թոքի, հաստ աղու, ստամոքսի չարորակ նորագոյացությունները: