Կարո՞ղ եք երաշխավորել, որ Լաչինի միջանցքի երկայնքով նոր երթուղու կառուցման նախագծով նոր տարածքներ չեն անցի Ադրբեջանին. Աբրահամյանը՝ Փաշինյանին
Ազգային ժողովում կառավարության հետ հարցուպատասխանի ժամանակ «Պատիվ ունեմ» խմբակցության անդամ Տիգրան Աբրահամյանը հիշեցրեց նոյեմբերի 9-ի եռակողմ հայտարարության 6-րդ դրույթը։ Ըստ այդ դրույթի սահմանվում է, որ կողմերի համաձայնությամբ Լեռնային Ղարաբաղի և Հայաստանի միջև կապն ապահովելու համար առաջիկա երեք տարիների ընթացքում պետք է հաստատվի Լաչինի միջանցքի երկայնքով նոր երթուղու կառուցման նախագիծ, որից հետո ռուսական խաղաղապահ զորակազմը կվերատեղկայվի այդ երթուղին պաշտպանելու համար։
Այնուհետև Տ.Աբրահամյանը հնչեցրեց հարցն ուղղված Նիկոլ Փաշինյանին. «Արդյո՞ք այս թեմայով բանակցություններ իրականացվում են, կա՞ հաստատված նախագիծ, թե որտեղով է նախատեսված նոր երթուղին։ Ադրբեջանի հավակնությունները իմանալով, իսկ մյուս կողմից արցախցիների մտահոգությունները հաշվի առնելով՝ մտավախություն կա, որ նոր երթուղին շրջանցելու է ոչ միայն Քաշաթախի շրջանի այս պահին մեր վերահսկողության տակ գտնվող Բերձոր քաղաքը, Սուս և Աղավնո գյուղերը, այլ Շուշիի շրջանի Հին Շեն, Մեծ Շեն, Եղցահող, Լիսագոր, Կանաչ Թալա, Տասը Վերստ գյուղերը։ Կարո՞ղ եք հստակ արձանագրել կամ երաշխավորել, որ չի հաստատվի Հայաստանն Արցախին կապող այնպիսի երթուղի, որի պայմաններում թվարկած գյուղերն ավտոմետ կերպով կանցնեն Ադրբեջանի վերահսկողության տակ թեկուզ անկլավի կարգավիճակով»։
Նիկոլ Փաշինյանն ասաց, որ այս պահին այդ թեմայով որևէ բանակցություն չի ընթանում ՀՀ կառավարության ներկայացուցիչների մասնակցությամբ։
«Գիտեմ, որ աշխատանքային քննարկումներ են տեղի ունեցել Արցախի իշխանությունների և ռուս խաղաղապահ ուժերի ներկայացուցիչների մասնակցությամբ։ Նաև մեր մասնագետները x պահից կմիանան, կձևակերպվի կոնկրետ առաջարկ, դրանք կքննարկվեն։ Ինչպես ասացիք՝ նշված է, որ պետք է տեղի ունենա կողմերի համաձայնությամբ։ Բնականաբար, այդ քննարկումների ընթացքում կարվի առավելագույնը, որ Արցախի ժողովրդի և Հայաստանի Հանրապետության շահերը առավելագույնս պաշտպանվեն այդ համատեքստում»,- նշեց Փաշինյանը։
Տիգրան Աբրահամյանն ավելի կոնկրետ հարց ուղղեց. «Արդյո՞ք ձեր համար սկզբունքային է կամ առաջնային է, որպեսզի չլինի մի այնպիսի երթուղի, որի արդյունքում թվարկածս գյուղերը որևէ պայմաններում որևէ կարգավիճակով չհայտնվեն Ադրբեջանի վերահսկողության տակ»։
Փաշինյանը պատասխանեց, որ չի հասցրել արձանագրել բոլոր բնակավայրերի անունները։
«Իհարկե, մտահոգությունները կարող են լինել, պետք է բարձրաձայնվեն, բայց պարզ է, որ Արցախի և Հայաստանի իշխանություններն ամեն ինչ կանեն, որ ձեր նշած սցենարը տեղի չունենան։
Ինչ վերաբերում է Լեռնային Ղարաբաղի գյուղերին, բնականաբար, առաջնահերթ խնդիր է, որը պետք է լուծվի»,- ասաց Փաշինյանը։
Լրահոս
Տեսանյութեր
«Գոյ» թատրոնի դերասանները դիմեցին ոստիկանություն
