Ձեր վստահելի աղբյուրը

Վերաքննիչ քրեական դատարանում շարունակվում են սահմանադրական կարգի ենթադրյալ տապալման գործի կարճման վերաբերյալ պաշտպանների և դատախազների բողոքների գործով լսումները։

Դատական նիստը սկսեց 15 րոպե ուշացումով, ինչպես հայտարարեց նախագահող դատավոր Նարինե Հովակիմյանը, նիստից ուշացել են դատախազները։

Նա նաև հայտարարեց՝ պաշտպաններից Կարեն Մեժլումյանը տեղեկացրել է, որ ազգականի մահվան կապակցությամբ մեկնել է Գորիս քաղաք, այսօրվա դատական նիստին մասնակցել չի կարող, խնդրել է իր բացակայությունը համարել հարգելի։ Պաշտպանը նաև խնդրել է այսօր չավարտել բողոքների քննությունը, ևս մեկ նիստ հրավիրել, որպեսզի կարողանա որպես պաշտպան իր դիրքորոշումը հայտնել դատախազների բողոքի կապակցությամբ։

Դատավոր Հովակիմյանը հայտնեց, որ խնդրանքը կդառնա քննարկման առարկա, իսկ մինչ այդ հիշեցրեց՝ նախորդ նիստում լսել են դատախազներին, պաշտպաններին, տուժողի ներկայացուցիչ Սեդա Սաֆարյանը ծանրաբեռնվածության պատճառով լքել էր նիստերի դահլիճը։ Այս դատական նիստում ձայնը տրվեց նրան։

Հիշեցնենք, որ Քրեական օրենսգքրի 300.1 հոդվածը ճանաչվել էր հակասահմանադրական, և այդ հիմքով ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գևորգյանի, ՀՀ պաշտպանության նախկին նախարար Սեյրան Օհանյանի, ԶՈՒ ԳՇ նախկին պետ Յուրի Խաչատուրովի նկատմամբ քրեական հետապնդումը դադարեցվեց։

Սեդա Սաֆարյանը հայտարարեց՝ գտնում է, որ առաջին ատյանի դատարանի որոշումը հիմնավոր չէ ու պատճառաբանված չէ։

Դատական նիստի ուղիղ հեռարձակումը՝ Yerevan.today-ի։