Ձեր վստահելի աղբյուրը

«Այսպես կոչված իշխանությունների արձագանքն ավելի լավ է չլիներ Որոտանի հատվածում ադերբեջանական ոստիկանական հենակետի տեղադրման վերաբերյալ, քանի որ այն, ինչ իրենք բանավոր խոսքում ասում են, դրա տակից ազգովի պետք է հետո դուրս գանք»,- ԱԺ-ում լրագրողների հետ ճեպազրույցում ասաց «Պատիվ ունեմ» խմբակցության անդամ Հայկ Մամիջանյանը։ 

ԱԺ Արտաքին հարաբերությունների հանձնաժողովի նախագահ Էդուարդ Աղաջանյանի ասածը՝  այդ հատվածը, որտեղ որ իրենք տեղակայված են և ճանապարհի այդ հատվածը, գտնվում է Սովետական Ադրբեջանի տարածքի մեջ, Հայկ Մամիջանյանի խոսքով, հետագայում ավելի շատ վնասելու է երկրին, ինչը կամ չեն հասկանում կամ հասկանալով են անում։

«ԱԱԾ-ն տարածում է հաղորդագրություն՝ կրկնելով վարչապետի աթոռը զբաղեցնող անձի հռետորիկան, որն իրենք հիմնավորում են, թե ասել են, որպեսզի մեր ազգաբնակչությունը չմտածի, որ դա հայկական տարածք է։

Այո, դա հայկական տարածք է, մեր հայրենիքն է»,- ասաց ընդդիմադիր պատգամավորը։

Նա նշեց, որ ադրբեջանական այդ քայլին որևէ արձագանք չի եղել ու քանի դեռ նմանօրինակ արձագանքներ չկան, թշնամին շարունակելու է հանդուգն, լկտի գործողություններ անել։

«Եթե 10 օր առաջ որպես վերլուծություն համարում էի, որ իրականում գաղտնի պայմանագրի աշխատանքներ են տարվում, այս ընթացքում գործընթացների մշտադիտարկումը ինձ հուշում է, որ հավանաբար հողերի հանձնումը շարունակվելու է հատվածային, դե ֆակտո իրողություն դարձած նմանօրինակ դրսևորումներով, այսինքն՝ ճանապարհն այնպես է կառուցվելու, որ որոշ հայկական գյուղեր դուրս մնան ու դատարկվեն»,- ասաց Հայկ Մամիջանյանը։

Նրա խոսքով, խորհրդային տարբեր քարտեզներ կան, Հայաստանի արտաքին դիվանագիտական բոլոր օղակները պետք է ունենան այն գրագիտությունը որպես «աշխատանքային փաստաթուղթ» օգտագործեն այն քարտեզը, որը ՀՀ համար ավելի ընդունելի է, ավելի իրական է ցույց տալիս պատմականորեն և էթնիկ տեսանկյունից հայկական հողերը։