Ձեր վստահելի աղբյուրը

Բժիշկների բողոքի ակցիան է անում ՀՀ գլխավոր  դատախազության մոտ՝ ի աջակցություն անազատության մեջ գտնվող հայտնի բժիշկ, «Հայաստան» խմբակցության անդամ Արմեն Չարչյանի։
Բժիշկ, դասախոս Սամվել Սահակյանը լրագրողների հետ զրույցում ասաց, որ այստեղ հավաքվելու նպատակն է հայտնելու իրենց մտահոգությունը ՀՀ քաղաքացի Արմեն Չարչյանի առողջական վիճակի վատթարացման մասին, քաղաքացու, ով արդեն ուներ ծանր հիվանդություն, անազատության մեջ մնալու պայմաններում խորացել է այդ հիվանդությունը, բազմաթիվ բարդություններ են ի հայտ եկել։ Նա նշեց, որ ուզում են հանդիպել գլխավոր դատախազի հետ, բանավիճելու չեն եկել, այլ խնդրանքով դիմելու։

«ՄԵզ մոտ տպավորություն է, որ գործ չի անում իր կողմից ևս արագացնելու Արմեն Չարչյանի պաշտպանի՝ կալանքի փոփոխման վերաբերյալ հրատապ նիստ հրավիրելու միջնորդությունները բավարարելու համար։

Արմեն Չարչյանն ունի ինսուլինակախյալ շաքարային դիաբետ հիվանդություն, ծանր ախտաբանություն է, բայց կառավարելի։ Համարյա բոլոր օրգան համակարգերը ախտահարված են, ծանր ախտահարումներ են։ Հանկարածկի իմացա, որ աչքն է ախտաբանական գործընթացի մեջ մտել»,- ասաց նա։

Ս. Սահակյանը նշեց, որր գոյություն ունի կառավարության 825 որոշում, որտեղ հստակ սահմանվում են այն հիվանդությունները, որոնք անհամատեղելի են քաղաքացու կալանքին կամ պատիժ կրելուն։ 

«Մեկ շաբաթ առաջ այս ցանկից մեկ հոդվածին էր համապատասխանում Չարչյանի առողջական վիճակի բարդացումները, այսօր իմացա, որ արդեն 4-ի է հասել։ Խոսքը ծանրագույն բարդացումների մասին է։

Մի շաբաթ հետո այս 4-ը կդառնա 8, մի շաբաթ հետո ոչ մի բան չի դառնա։ Ո՞վ է շահելու այս ամենից։
Մեկ շաբաթ հետո կարող է ուշ լինել, չեմ ուզում բացահայտել ախտորոշումները, բայց հավատացեք՝ շատ ավելի վատ է վիճակը, քան ես կարող եմ ներկայացնել։ Եթե մնա այսպես, չկառավարվող այս ծանր հիվանդությունը չափազանց վտանգավոր է»,- ասաց բժիշկ Սահակյանը։

Նա նշեց, որ իրենք ոչ մի քաղաքական մտքեր չեն հնչեցնելու, քրեաիրավական վերլուծություններ չենք կատարելու, իրենք բժիշկներ են, հասկանում են բժշկությունից։

«Մենք չենք ասում արդարացրեք, ազատեք, ասում ենք՝ խափանման միջոցը փոխեք, որպեսզի կարողանանք կազմակերպել պատշաճ բուժում, ամեն անգամ ինչ-որ հետազոտություն նշանակելու համար ինչ-որ մարմին հիմնավորումներ չպահանջի, չասեն՝ ոչ թե այս, այլ այն հիվանդանոց պետք է տանել, այսինքն  անտեղի ձգձգումներ չլինեն»,- ասաց Ս. Սահակյանը։